BQO-da «Meniń aýlam – meniń baǵym» jobasyn júzege asyrý kózdelýde
Oblys ákimi Ǵalı Esqalıev Facebook-tegi óz paraqshasynda málim etkenindeı, memleket jyl saıyn «Eńbek» baǵdarlamasy boıynsha óńir turǵyndaryna 100 – 580 myń teńge aralyǵynda qaıtarymsyz granttardy berý úshin júzdegen mln teńge bólip keledi.
Bıyl osy maqsatqa 800 mln teńgege jýyq qarjy josparlandy.
Ádette turǵyndar granttardy qus ósirýge, tigin mashınalaryn, kondıterlik jabdyqtar alýǵa, shashtaraz ashýǵa jáne basqa maqsatqa paıdalanady.
BQO ákimdiginiń bastamasymen bıyldan bastap baǵdarlama aıasynda grant esebinen jemis-jıdek butalary men aǵash kóshetterin berý usynysy engizildi.
QR Úkimetiniń 2020 jylǵy 30 jeltoqsandaǵy №932 qaýlysyna sáıkes «Eńbek» memlekettik baǵdarlamasyna ózgerister men tolyqtyrý engizilip, memlekettik granttar budan bylaı kóshet, butalardy, tuqymdardy jáne ósimdikterdi satyp alýǵa beriletin boldy.
«Eńbek» baǵdarlamasyna sáıkes atqarylǵan jumystardy saraptap qaraǵanda, ókinishke qaraı, ótken jyldary grant alǵandardyń ishinde tek 15-20 paıyzy ǵana óz kásibin júrgizip, turaqty tabys kózin taba aldy.
Ákimniń sózine qaraǵanda, baý-baqsha ósirýdiń paıdasy mol. Óıtkeni jemis-jıdekterge, sondaı-aq odan óndirilgen djem, tosap, keptirilgen jemis sııaqty ónimderge naryqta suranys mol.
Eger bul jetkilikti óndirilgen jaǵdaıda shetten keletin ónimderdiń ornyn basyp, tipti yǵystyryp shyǵara alar edi. Onyń ústine ekologııalyq jaǵynan taza tabıǵı ónimniń sapasy da joǵary bolatyny túsinikti.
Qazirgi tańda osy jergilikti ónimderge keńinen jol ashý úshin memlekettik tapsyrys berý joldary qarastyrylýda.
Baq jaqsy baptalsa, ol ıesine jyl saıyn turaqty ónimmen birge kiriske qol jetkizýge jáne bolashaqta 3-8 mln teńge kóleminde jeńildikpen shaǵyn nesıe alýǵa múmkindik beredi.
Ásirese, aýyldyq jerlerde myńdaǵan otbasy óz úıleriniń aýlasynan baqsha ósirip, tabys taba alady. Ol úshin aýlada 20 - 50 sharshy metr jer telimi bolsa jetkilikti.
Osy oraıda óńirde turǵyndarǵa aqyl-keńes berip, jol kórsetetin baǵbandar az emes. Sonyń biri – oraldyq Qaırat Kárimov. Baý-baqsha ıeleri alysqa barmaı-aq, osyndaı bilikti baǵbannan aǵash kóshetterin, ósimdik tuqymdaryn satyp alar edi.
Ataqty ǵalym-selektsıoner Ivan Mıchýrınniń shákirti Sergeı Isaevtyń isin jalǵastyrǵan Q.Kárimov segiz jyldan astam ýaqyttan beri Oral qalasy mańyndaǵy aýmaǵy 5 gektar burynǵy alma baǵy alqabynda baý-baqsha ósirýmen aınalysyp keledi. Búginde S.Isaev atyndaǵy halyqaralyq eksperımentaldyq kollektsııalyq pıtomnık-baqtyń dańqy Reseı ǵana emes, basqa da shet elderge jetken.
«Munda almanyń 200, júzimniń 175 túrli ósiriledi. Qaı jerde jylt etken jańalyq bar, sony izdep taýyp, óz baǵymda júzege asyrýǵa tyrysamyn. Dastarhanymyzda keptirilgen jemis túrleri jetkilikti. Baý-baqsha ósiremin deýshilerge qoldan kelgen kómegimizdi kórsetýge daıynbyz. Ár aýla, ár aýyl, ár qala jasyl jelekke tolsa, odan búkil halyq utar edi. Jerimiz jalańash qalmas edi. Aldaǵy ýaqytta Samara baǵytyndaǵy jol boıynan taǵy bir jer telimin alyp, durys suryptalǵan aǵashtardan orman ósirgim keledi. Sonda bizdiń elimizge kirgen sheteldikterdiń kózine keremet jasyl toǵaı túser edi», dedi QazAqparat tilshisine Qaırat Kárimov.
