BQO-da memlekettik tapsyrys aıasynda jeke mektepterdi qarjylandyrý máselesi sheshildi me
ORAL. KAZINFORM – Oral qalasynda jeke mektepterdiń quryltaıshylary jınalyp, memlekettik tapsyrys aıasynda tólenýi tıis qarajattyń keshiktirilip otyrǵanyn málimdedi.
Onda der kezinde aılyq almaýy saldarynan pedagogtardyń ereýilge shyǵýy múmkin ekendigi aıtyldy.
Osyǵan oraı BQO bilim basqarmasynan túsken jaýapta málim etilgenindeı, 2025 jyldyń qańtarynan bastap jeke mektepterdegi memlekettik bilim berý tapsyrysyn qarjylandyrý tetigi ózgerdi: qarjylandyrý jónindegi ókilettikter jergilikti atqarýshy organdarǵa berildi.
Jańartylǵan júıe aıasynda Batys Qazaqstan oblysyndaǵy jeke mektepter qoldanystaǵy normatıvter men zańnamaǵa sáıkes memlekettik bilim berý tapsyrysyn alýdy jalǵastyryp keledi. 2025–2026 oqý jylynan bastap óńirde «Jeke bilim berý uıymdarynda memlekettik bilim berý tapsyrysyn ornalastyrýdyń jańa mehanızmi» pılottyq jobasy iske qosyldy. Joba QR Oqý-aǵartý mınıstrliginiń 2025 jylǵy 6 qarashadaǵy №251 birlesken buıryǵymen jáne BQO ákimdiginiń 2025 jylǵy 10 qarashadaǵy №241 qaýlysymen bekitilgen.
Ulttyq bilim berý derekter bazasynyń (UBDB) málimetteri boıynsha 2025 jyldyń qyrkúıeginen bastap oblysta 15 jeke mektep jumys isteıdi, onyń 11-i 2 538 oqýshyǵa memlekettik tapsyrys alady.
Basqarma derekterine qaraǵanda, memlekettik bilim berý tapsyrysy bıyl úsh transh arqyly 1 mlrd 508 mln teńge kóleminde qarjylandyrylady.
Birinshi transh — 775 mln teńge, sonyń 505 mln teńgesi – respýblıkalyq, 250 mln teńgesi jergilikti bıýdjetten.
Bul qarajat 2025 jyldyń qańtar–mamyr aılaryndaǵy shyǵyndardy óteýge baǵyttaldy.
Ekinshi transh — 230 mln teńge. Jergilikti bıýdjet esebinen bólingen qarajat qyrkúıek-qazan aılaryndaǵy memlekettik tapsyrysty qarjylandyrýǵa arnalǵan.
Bul transhtyń tólenýi pılottyq jobanyń tek 2025 jyldyń qarasha aıynda bekitilýine baılanysty kidirdi. Kesh bekitý derekterdi tsıfrlaý jáne LMS júıesine ıntegratsııalaý barysynda tehnıkalyq qatelikterge ákeldi.
Qazirgi ýaqytta tehnıkalyq jumystar tolyq aıaqtaldy. «E-QAZYNA» portalynda konkýrs ótkizildi. Jeke mekteptermen sharttar jasalyp, qarjylandyrý bastaldy.
Úshinshi transh — 503 mln teńge. Jergilikti bıýdjet qarjysy qarasha-jeltoqsan aılaryndaǵy shyǵyndardy tolyq óteýdi qamtamasyz etedi.
- Qazirgi tańda Batys Qazaqstan oblysynda jeke mektepterdi memlekettik bilim berý tapsyrysy aıasynda qarjylandyrý boıynsha qıyndyqtar joq. Qajetti qarajat tolyq kólemde bólindi, konkýrs protsedýralary júrgizildi, al pılottyq jobany engizý kezindegi tehnıkalyq máseleler sheshimin tapty. Jańa tetik jeke bilim berý uıymdaryn qarjylandyrýdyń ashyqtyǵy men tıimdiligin arttyrýǵa baǵyttalǵan, - delingen resmı jaýapta.
Eske sala keteıik, budan buryn BQO-da aýyl balalary tozyǵy jetken mektepte bilim alyp júrgenin jazǵan bolatynbyz.
