BQO-da memlekettik satyp alý zańyn buzǵan sheneýnikke aıyppul salyndy
ORAL. KAZINFORM — Batys Qazaqstan oblysy Syrym aýdany bilim berý bóliminiń basshysy Ákejan Jambylovtyń memlekettik satyp alý zańyn buzǵany belgili boldy.
Zańger, BQO qoǵamdyq keńesiniń múshesi Baýyrjan Ahmetjannyń málim etkenindeı, aýdandyq bilim berý bólimi men «JaıykPromServıs» JShS ótken jyly 23 qyrkúıekte Bulan aýyly týrızm ortalyǵyn aǵymdaǵy jóndeýge shart jasaǵan.
Joba quny — 21 mln 362,994 myń teńge. Ótken jylǵy 7 qarashadaǵy aktige sáıkes jumys tolyq aıaqtalyp, ol úshin 21,3 mln teńge aýdarylǵan.
Alaıda BQO boıynsha ishki memlekettik aýdıt departamentiniń málimetine sáıkes «Memlekettik satyp alý» zańynyń 17-baby buzylyp, merdigerge jumystardy merziminde oryndamaǵany úshin 918,5 myń teńge ósimpul eseptelindi. Al bilim berý bólimi oryndalmaǵan jumysqa 901,1 myń teńge tólegen. Anyqtalǵan buzýshylyqtardy joıý jáne olarǵa jol bergen tulǵalardyń jaýapkershiligin qaraý týraly nusqama berildi. Aýdandyq bilim berý bólimi bul nusqamany oryndamaǵandyqtan, mekeme basshysy Á.Jambylovqa «Ákimshilik quqyq buzýshylyq týraly» kodeksiniń 462-baby 3-tarmaǵymen hattama toltyrylyp, Syrym aýdandyq sotyna joldandy. Qazir bul is sotta qaralyp jatyr.
Merdigerdi memlekettik satyp alýǵa josyqsyz qatysýshy dep taný týraly talap aryzben sotqa júginbegeni úshin atalmysh kodekstiń 207-baby 10-2-tarmaǵymen Á.Jambylov kináli dep tanylyp, 64 875 teńge aıyppul tóledi.
Sonymen qatar Syrym aýdandyq bilim berý bólimi men «S.INSIGHT» JShS arasynda «Blok-modýldik qazandyqty ornatý» týraly 2025 jylǵy 28 qarashadaǵy shartqa sáıkes 25,2 mln teńge tólem jasalǵan. Aýdıtpen taýardyń tehnıkalyq ereksheligi ishinara sáıkes kelmeıtindigi anyqtaldy. Áıtse de bólim sotqa «S.INSIGHT» JShS-in memlekettik satyp alýǵa josyqsyz qatysýshy dep taný týraly talap aryz bermegen. Osy derek boıynsha da Á.Jambylovqa 64 875 teńge aıyppul salyndy.
— Osylaısha, atalǵan bólim basshysy memlekettik satyp alý zańnamasyn buzýdyń eki deregi boıynsha barlyǵy 129 750 teńge aıyppul tóledi. Bul «Quqyǵyńdy bil, qoǵamnyń belsendi múshesi bol!» jobasy aıasynda júzege asyrylyp jatqan qoǵamdyq baqylaýdyń nátıjesi der edim, — dedi B.Ahmetjan.
Eske sala keteıik, budan buryn BQO-da aýyl turǵyndary jaıylyp jer joqtyǵyn aıtyp shaǵymdanǵanyn jazǵan edik.
