BQO-da memlekettik satyp alý barysynda zań buzǵan kompanııaǵa 15,5 mln teńge aıyppul salyndy

ORAL. KAZINFORM — Batys Qazaqstan oblysynda naryqtaǵy ústem jaǵdaıdy teris paıdalanǵan, básekelestikke qarsy áreketterge jol bergen kompanııalarǵa qatysty tıisti sharalar qabyldandy.

QR Básekelestikti qorǵaý jáne damytý agenttigi BQO boıynsha departamentiniń basshysy Saǵyndyq Erǵalıevtiń óńirlik kommýnıkatsııalar qyzmeti alańynda ótken brıfıngte málim etkenindeı, «Qurylysınvest NS» JShS-ǵa qatysty júrgizilgen tergep-tekserý aıaǵyna deıin jetkizilgen.

Saǵyndyq Ǵubaıdollaulynyń sózine qaraǵanda, atalǵan kompanııa memlekettik satyp alý kezinde basqa qatysýshymen zańsyz kelisimge kelip, ónim jetkizýshini anyqtaýda básekelestik kúresti tolyqtaı joıǵan. 

— Uzaqqa sozylǵan talqydan keıin sot 2025 jyldyń maýsymynda «Qurylysınvest NS» kompanııasyna monopolııalyq tabysty tárkileýmen birge 15,5 mln teńge ákimshilik aıyppul saldy. Sonymen qatar jyl basynan beri monopolııaǵa qarsy organǵa zańmen bekitilgen tártipte habarlama bermegeni úshin «Batys Qazaqstan aımaqtyq elektr jelilik kompanııasy» JShS 3,1 mln teńge, «Baıston» JShS 258 myń teńge kóleminde ákimshilik jaýapkershilikke tartyldy, — deıdi S. Erǵalıev.

Onyń aıtýynsha, qazirgi kezde «Oral» halyqaralyq áýejaıy» JShS qyzmetinde avıakerosınge monopolııalyq joǵary baǵa qoıý dereginiń bar-joqtyǵyna qatysty tergep-tekserý júrgizilip jatyr. Sonyń qorytyndysyna sáıkes buzýshylyq anyqtalǵan jaǵdaıda monopolııaǵa qarsy den qoıý sharalary qabyldanady. 

Departament málimetterine sáıkes naryqtaǵy ústem jaǵdaıdy teris paıdalanǵan, sondaı-aq josyqsyz básekelestikke jol bergen basqa da kompanııalarǵa tıisti sharalar qoldanyldy.

Eske sala keteıik, budan buryn Oralda tender ótkizý kezinde básekelestikke qarsy áreketke jol berilgenin jazǵan edik.