BQO-da memlekettik organdarda 219 jaqyn týystyń birge jumys isteıtini anyqtaldy
ORAL. KAZINFORM – Memlekettik qyzmet isteri agenttiginiń BQO boıynsha departamenti oblystyq jergilikti atqarýshy organdarda jáne olarǵa qarasty uıymdarda profılaktıkalyq monıtorıng júrgizdi.
Departamenttiń bas mamany Raıymbek Qaınenovtiń ádep jónindegi keńestiń otyrysynda málim etkenindeı, monıtorıngtiń negizgi maqsaty – yqtımal táýekelderdi aldyn ala anyqtaý jáne memlekettik organdarǵa zańnama talaptaryn saqtaý boıynsha tıisti usynymdar berý.
Onyń sózine qaraǵanda, memlekettik qyzmetshilerdiń sybaılas jemqorlyqqa qarsy shekteýlerdi saqtaýyna júrgizilgen monıtorıng barysynda memlekettik organdar men olarǵa qarasty uıymdarda 219 jaqyn týystyń birge qyzmet atqaratyny anyqtaldy. Bul rette jaqyn týystardyń bir mekemede nemese uıymda qyzmet atqarýynyń ózi zańnama talaptaryn buzý bolyp tabylmaıdy. Negizgi talap – olardyń arasynda tikeleı baǵynystylyqqa jol bermeý jáne múddeler qaqtyǵysynyń aldyn alý.
- Monıtorıng barysynda jekelegen jaǵdaılarda osy talaptar qosymsha zerdelendi. Máselen, Bókeı ordasy aýdandyq bilim berý bóliminde bólim basshysy men ádistemelik kabınet ádiskeriniń arasynda týystyq baılanys, al Tasqala aýdandyq mádenı-demalys ortalyǵynda dırektor men ádistemelik bólim meńgerýshisi arasynda erli-zaıyptylyq qatynas bary anyqtaldy. Atalǵan derekter boıynsha zańnama talaptaryn saqtaý turǵysynan tıisti profılaktıkalyq jáne túsindirý sharalary qabyldandy, - dedi R.Qaınenov.
Bas mamannyń aıtýynsha, «Sybaılas jemqorlyqqa qarsy is-qımyl týraly» zańnamada jaqyn týystardyń tikeleı baǵynystylyǵyna jol berilmeıtini belgilengen. Bul talap kadrlyq sheshimderdiń obektıvtiligin qamtamasyz etýge jáne yqtımal múddeler qaqtyǵysynyń aldyn alýǵa baǵyttalǵan.
Sonymen qatar memlekettik satyp alý rásimderine profılaktıkalyq monıtorıng júrgizildi. Onyń barysynda jekelegen satyp alýlardy josparlaý kezinde qoldanystaǵy emes normatıvtik quqyqtyq aktilerge silteme jasaý, sondaı-aq satyp alý qajettiligi men bıýdjet qarajatyn paıdalaný negizdiligin qosymsha qaraýdy qajet etetin jaǵdaılar anyqtaldy.
Departament málimetine sáıkes monıtorıng nátıjesinde memlekettik organdar men uıymdarǵa tıisti usynymdar berilip, jalpy quny shamamen 100 mln teńgeni quraıtyn jekelegen memlekettik satyp alý rásimderin qaıta qaraý jáne toqtatý boıynsha sharalar qabyldandy. Mysaly, BQO jumyspen qamtýdy úılestirý jáne áleýmettik baǵdarlamalar basqarmasyna qarasty Krýgloozernyı arnaýly áleýmettik qyzmet kórsetý ortalyǵynda 8 mln 448,160 myń teńge somasynda janar-jaǵarmaı satyp alýdy josparlaý máselesi qaraldy. Satyp alýdy josparlaý kezinde maýsymdyq qajettilik pen bıýdjet qarajatyn paıdalaný negizdiligine qosymsha baǵa berý qajettiligi týyndady. Departamenttiń profılaktıkalyq sharalary nátıjesinde atalǵan satyp alý rásimi toqtatylyp, bıýdjet qarajatyn tıimdi paıdalaný máselesi qaıta qaraldy.
Jalpy, júrgizilgen monıtorıng memlekettik satyp alýdy josparlaý kezinde naqty qajettilikti, bıýdjet qarajatyn paıdalaný negizdiligin jáne qoldanylatyn normatıvtik quqyqtyq aktilerdiń qoldanysta bolýyn aldyn ala tekserýdiń mańyzdylyǵyn kórsetti.
Eske sala keteıik, budan buryn BQO-da qyzmettik kólikterdiń jyldamdyq asyrý derekteri kóbeıgenin jazǵan edik.
