BQO-da memlekettik qyzmetshige gúl syılaǵan áıelge jarty mln teńge aıyppul salyndy

ORAL. KAZINFORM – Oral qalasy mamandandyrylǵan ákimshilik sotynda B. degen áıelge qatysty QR Ákimshilik quqyq buzýshylyq týraly kodeksiniń 676-baby boıynsha iske núkte qoıyldy.

BQO sotynyń baspasóz qyzmetinen málim etkenindeı, Oral qalasynyń probatsııa qyzmetinde esepte turǵan sottalǵan áıel óziniń ınspektory Q-ǵa týǵan kúnine gúl shoǵyn jáne shokoladpen qaptalǵan qulpynaı salynǵan shaǵyn qorapty syıǵa tartqan.

Sotta anyqtalǵanyndaı, QR QK 190-baby 3-bólimi 4-tarmaǵyna sáıkes 3 jylǵa bas bostandyǵy shektelgen B. probatsııa qyzmetiniń ınspektory Q-nyń tikeleı baqylaýynda boldy.

Sot otyrysynda áıel kinásin moıyndap, teris oıy joqtyǵyn, ol adamǵa gúl berýge bolmaıtynyn bilmegenin aıtty.

QR Ákimshilik quqyq buzýshylyq týraly kodeksiniń 676-babyna sáıkes jeke adamdardyń memlekettik qyzmetti oryndaýǵa ýákilettik berilgen nemese olarǵa teńestirilgen tulǵalarǵa zańsyz materıaldyq syıaqy, syılyqtar, jeńildikter berýi ne qyzmetter kórsetýi 200 AEK mólsherinde aıyppul salýǵa ákep soǵady. Sondaı aq «Sybaılas jemqorlyqqa qarsy is-qımyl týraly» QR Zańynyń 12-baby memlekettik qyzmetshilerge jáne olardyń otbasy múshelerine qyzmettik ókilettikterine kiretin áreketteri (ne áreketsizdigi) úshin syılyqtar qabyldaýǵa tolyq tyıym salady.

- Sot isti zerdelep, B-ny atalǵan kodekstiń 676-babynda kórsetilgen ákimshilik quqyq buzýshylyq jasaǵany úshin kináli dep tanyp, oǵan 550 480 teńge kóleminde aıyppul saldy. Qaýly zańdy kúshine engen joq, - dep habarlady vedomstvodan.

Eske sala keteıik, budan buryn Oralda sot qala ákimin komıssııa sheshimin qaıta qaraýǵa mindettegenin jazǵan edik.