BQO-da memlekettik qyzmet sapasyna qatysty 3 myńnan astam zań buzý anyqtaldy

ORAL. KAZINFORM – Batys Qazaqstan oblysynda memlekettik qyzmetterdiń sapasyn baqylaý is-sharalary barysynda bes aıda 3 098 zań buzýshylyqqa jol berilgeni belgili boldy.

Memlekettik qyzmet isteri agenttigi BQO boıynsha departamentiniń basshysy Murat Baısalovtyń málim etkenindeı, eń kóp zań buzýshylyq turǵyn úı-kommýnaldyq sharýashylyǵy (971, 31,3 paıyz) jáne densaýlyq saqtaý (856, 27,6 paıyz) salasynda tirkelgen.

Onyń sózine qaraǵanda, sonymen qatar jer qatynastary (390, 12,5 paıyz), kólik (348, 11,2 paıyz), qaýipsizdik, qorǵanys jáne sot ádildigi (72, 2,3 paıyz), bilim (68, 2,1 paıyz), múlikke jáne zııatkerlik menshikke quqyqtar (178, 5,7 paıyz), sáýlet jáne qala qurylysy (86, 2,7 paıyz), qujattandyrý (30, 0,9 paıyz) jáne ózge salalarda (18, 0,8 paıyz) zań buzý anyqtaldy.

— Eń kóp buzýshylyq memlekettik qyzmetter kórsetý tártibin saqtamaýǵa (1 420, 45,8 paıyz) qatysty. Sondaı-aq syrtqy monıtorıngpen 1 640 buzýshylyq (878 merzim buzý, 619 qyzmet kórsetý tártibin buzý) belgili boldy. Anyqtalǵan buzýshylyqtarǵa jol bergen kináli 16 adam tártiptik jaýapkershilikke tartyldy, — dedi Murat Baısalov.

Onyń aıtýynsha, jyl basynan beri qyzmet alýshylardan memlekettik qyzmet kórsetýdiń sapasyna qatysty 42 shaǵym túsken. Sonyń ishinde 15 shaǵymda kórsetilgen dálelder rastalyp, qyzmet alýshylardyń buzylǵan quqyqtary qalpyna keltirildi. 

Eske sala keteıik, budan buryn BQO-da sybaılas jemqorlyqqa barǵan 4 memlekettik qyzmetshiniń sottalǵanyn jazǵan bolatynbyz.