BQO-da Memlekettik rámizderdiń 25 jyldyǵyna oraı birneshe shara uıymdastyrylyp otyr

ORAL. QazAqparat - Batys Qazaqstan oblysynda Memlekettik rámizderdiń 25 jyldyǵyna oraı birneshe shara uıymdastyrylyp otyr. Bul týraly búgin BQO ákimi Altaı Kólginovtiń tóraǵalyǵymen ótken QR Memlekettik rámizderi jónindegi komıssııa otyrysynda oblystyq ishki saıasat basqarmasynyń basshysy Baqytjan Narymbetov málim etti, dep habarlaıdy «QazAqparat» tilshisi.

Baqytjan Haberulynyń aıtýynsha, oblystyq jastar saıasaty máseleleri basqarmasynyń uıymdastyrýymen áleýmettik jelilerde «Meniń rámizderim - meniń maqtanyshym» atty shara ótkizilýde. Bul shara basty bettegi sýretti www.zhastar-07.kz saıtyndaǵy «Avataryńdy jańart» bóliminde ornalasqan arnaıy avatarkalarga aýystyrý arqyly júrgizilýde. Sondaı-aq áleýmettik jelilerde jastar arasynda Memlekettik rámizder taqyrybynda taqyryptyq beınerolıkter daıyndalyp, taratylýda. 3 maýsym kúni BQO dene shynyqtyrý jáne sport basqarmasynyń uıymdastyrýymen «Meniń Týym» estafetasy mototsıklshiler, veloshabandozdar, sportshylar, eskekshilerdiń qatysýymen ótip, olar qala kireberisindegi «Oral» jazýynan jańa alańǵa deıin Memlekettik týdy alyp júredi. Óńirdiń betke ustar sportshylary qatysatyn estafeta jańa alańda jastardyń flesh-mobymen támamdalmaq. 4 maýsym kúni osy jańa alańda QR Memlekettik rámizderiniń 25 jyldyǵyna arnalǵan saltanatty shara ótip, onda kók baıraǵymyz bıikte jelbirep, Gımn shyrqalady. Oǵan qosa sol kúni tańerteń barlyq temirjol vokzaldarynda bir mezgilde Gımn oryndalsa, qala kósheleri men qoǵamdyq oryndarǵa «Meniń Qazaqstanym» atty úgit-nasıhat jumystaryn júrgizetin shaǵyn avtobýs shyǵady. Mereke kúni qalalyq mádenıet jáne demalys saıabaǵynda sporttyq jarystar jastardyń patrıottyq sharasyna ulaspaq. Oblys aýdandarynda da avto jáne velosherý, basqa da túrli mádenı-sporttyq sharalar josparlanýda.

Basqarma basshysy sonymen qatar atalmysh komıssııanyń jumys josparyna sáıkes bıylǵy sáýir aıynda ınspektsııalyq toptyń Syrym jáne Qaratóbe aýdandarynda memlekettik rámizderdi tekserý boıynsha monıtorıng júrgizgenin jetkizdi. Tekseris qorytyndysyna sáıkes kemshilikterdiń kóbi sol boıda túzetilse, keıbir olqylyqtardyń oryn alý sebepteri zerdelenip, oǵan kináli adamdarǵa shara qoldanyldy.

Taǵy bir eskeretin jaıt, «QR Memlekettik rámizderi týraly» Konstıtýtsııalyq zańyna 2014 jyly ózgerister men tolyqtyrýlar engizildi. Soǵan sáıkes Eltańbanyń túsine ózgerister engizildi jáne burynǵy ataýlarǵa qosymsha jańa ataýlar qosyldy. Jańa talap boıynsha árbir satyp alynǵan Eltańbanyń qoldanylý merzimi úsh jyl bolyp shekteldi. Barlyq mekemeler Eltańbany bıylǵy 1 shildege aýystyrýy kerek.