BQO-da memlekettik qyzmetshiler 50-ge jýyq syılyqty arnaıy qorǵa tapsyrǵan
ORAL. QazAqparat - Batys Qazaqstan oblysynda memlekettik qyzmetshiler sońǵy úsh jylda 48 syılyqty ýákiletti organǵa tapsyrǵan, dep habarlaıdy QazAqparat tilshisi.
QR Qarjy mınıstrligi Memlekettik múlik jáne jekeshelendirý komıteti Batys Qazaqstan departamentiniń basshysy Ermek Súıerbaevtyń aıtýynsha, syılyqtyń deni - kádesyılar, kartına, músinsheler, alkogol ónimderi, kámpıtter.
Onyń sózine qaraǵanda, barlyq memlekettik qyzmetshiler alǵan syılyqtaryn jeti kún ishinde tapsyrýy tıis.
Memlekettik múlik jáne jekeshelendirý departamenti ýákiletti organ retinde arnaıy memlekettik qorǵa tapsyrylǵan syılyqtardy esepke alyp, baǵalap, saqtaıdy. Eger syılyqtar jergilikti atqarýshy organǵa tapsyrylsa, tizimdeme aktisine qol qoıylǵannan keıin ýákiletti organǵa tıisti habarlama jiberedi.
«Mamandandyrylǵan qorǵa tapsyrylǵan syılyqtar veb-portal arqyly naryqtyq baǵamen satýǵa qoıylady. Atalmysh syılyqtardy satýdan 2,5 mıllıondaı teńge túsken. Taǵy bir aıta ketetin jaıt, memlekettik qyzmetshi syılyqty joǵary turǵan organnyń kelisimimen naryqtyq baǵaǵa satyp ala alady», dedi E.Súıerbaev.
