BQO-da memlekettik qyzmet salasynda 73 zańbuzýshylyq anyqtaldy
ORAL. QazAqparat - Batys Qazaqstan oblysynda qazirgi tańda 458 memlekettik organ bolsa, memlekettik qyzmetshilerdiń shtat sany - 4444, sonyń ishinde jeteýi - saıası qyzmetshiler, 19-y «A» korpýsy laýazymy, 4418-i - «B» korpýsynyń ákimshilik memlekettik qyzmetshileri.
Bul týraly búgin Ortalyq kommýnıkatsııalar qyzmeti óńirlik fılıalynda QR Memlekettik qyzmet isteri jáne sybaılas jemqorlyqqa qarsy is-qımyl agenttigi BQO boıynsha departamentiniń basshysy, ádep jónindegi keńes tóraǵasy Bolat Isaqov málim etti, dep habarlaıdy «QazAqparat» HAA tilshisi.
Onyń aıtýynsha, 2016 jyly BQO memlekettik organdary 1451 bos ákimshilik memlekettik qyzmet laýazymdaryna konkýrstar ótkizdi. 645 bos laýazymǵa jalpy konkýrs ótkizildi. Osy konkýstarǵa qatysqan 1305 úmitkerdiń 467-si memlekettik qyzmetke ornalasýǵa múmkindik aldy. Komıssııa jumysynyń ashyqtyǵy men ádildigin qamtamasyz etý úshin onyń otyrysyna 894 baıqaýshy, 733 sarapshy qatysyp, baqylady. Jyl ishinde 1541 memlekettik qyzmetshini oqytý josparlansa, ol 1731-ge jetip, 112 paıyzǵa oryndaldy. 448 memlekettik qyzmetshi qaıta daıarlyqtan ótip, 1274 qyzmetshi biliktiligin kóterdi.
Memlekettik qyzmet týraly zańnamanyń qoldanylýyna jáne memqyzmetshilerdiń qyzmettik ádepti saqtaýyna qatysty departament 43 tekserý júrgizdi. Sonyń nátıjesinde memlekettik qyzmet jáne qyzmettik ádep zańnamasy salasynda 73 zańbuzýshylyqqa jol berilgendigi anyqtaldy.
Ótken jyly ádep jónindegi keńestiń 11 otyrysy ótip, onda 73 másele qaraldy. Memlekettik qyzmetshilerge qatysty 54 tártiptik is qaralyp, 32 adamǵa, sonyń ishinde 20-syna memlekettik qyzmetke kir keltiretin tártiptik teris qylyqqa jol bergeni úshin, 12-sine Ádep kodeksin buzǵany úshin tártiptik jaza qoldaný jóninde usynys berilip, ol tolyqtaı oryndaldy.
Óńirdegi memlekettik organdar men basqa da qyzmet oryndary memlekettik qyzmettiń 328 túrin kórsetedi. Ótken jyly BQO boıynsha 4 571 110 qyzmet kórsetildi. Bul 2015 jylǵydan 1 386 084-ke nemese 30 paıyzǵa artyq.
«Departament jumysynyń negizgi baǵyttarynyń biri - sybaılas jemqorlyqqa qarsy mádenıetti qalyptastyrý. Bul oraıda 27 myńǵa jýyq adamdy qamtyǵan 381 is-shara ótkizildi», - dedi Bolat Isaqov.
