BQO-da memleket paıdasyna 291 mln teńge óndirildi
BQO prokýrory Serik Shalabaevtyń óńirlik kommýnıkatsııalar qyzmeti alańynda ótken brıfıngte málim etkenindeı, Memleket basshysynyń, Bas prokýrordyń tapsyrmasyna sáıkes basty nazar ádettegideı azamattardyń áleýmettik-turmystyq máselelerin sheshýge baǵyttaldy.
Serik Rysqalıulynyń sózine qaraǵanda, jyl basynan beri 41 tekserý, 134 taldaý júrgizilip, 344 zań buzýshylyq anyqtaldy. Sondaı-aq sotqa deıingi 8 tergep-tekserý bastalyp, onyń beseýi sotqa joldandy.
Nátıjesinde 53 myń azamattyń quqyǵy qorǵaldy. Kináli 416 adam ártúrli jaýapkershilikke tartyldy. Memleket paıdasyna 291 mln teńge óńdirildi, 372 mln teńge somasyndaǵy múlik qaıtaryldy.
Oblys prokýrorynyń aıtýynsha, eńbek zańnamasynyń saqtalýyna da erekshe kóńil bólinip otyr. Bul salada 20 myńnan astam jumysshynyń quqyǵy qorǵaldy, 610 jumysshyǵa 50 mln teńgege jýyq jalaqysy tólendi. Ujymdyq sharttar sáıkestendirilip, olardyń quqyǵyn shekteıtin zańsyz aktilerdiń kúshi joıyldy.
Sondaı-aq paıdalanylmaı otyrǵan 342 myń gektar jaıylymdyq jer anyqtaldy. Sonyń 29 myńy memleketke qaıtaryldy. Qalǵandary boıynsha jumystar jalǵasyp jatyr.
Oblysta aýyz sý tarıfterin kóterý derekteri anyqtalyp, 6 myńǵa jýyq tutynýshynyń quqyǵy qorǵaldy. Bókeı ordasy, Terekti, Báıterek aýdandarynda olar 1 tekshe metr aýyz sýǵa bekitilgen 90 teńgeniń ornyna 200-den 300 teńgege deıin tólep kelgen.
Óńirdegi krımınogendik jaǵdaıǵa toqtalǵan prokýror qylmys deńgeıi 24 paıyzǵa (3287-den 2511-ge) tómendegenin jetkizdi. Sonyń ishinde kóshe qylmystary, ıaǵnı tonaý, sondaı-aq, urlyq, buzaqylyq birneshe ese azaıdy. Alǵash ret sońǵy úsh jylda alaıaqtyq 21 paıyzǵa (544-ten 428-ge) qysqardy.
«Halyq arasynda túsindirý jumystarynyń júrgizilýine qaramastan, azamattar alaıaqtardyń arbaýyna túsip jatyr. Kóbinese alaıaqtar ózderin bank qyzmetkeri retinde tanystyryp, derbes derekterdi, banktik shottar týraly málimetterdi, qupııa sózder men parolderdi suraıdy. Basqa jaǵdaıda alaıaqtar ózderin quqyq qorǵaý organdarynyń qyzmetkeri retinde kórsetip, aqsha berýdi talap etedi. Olardyń túpki maqsaty – banktik shottarǵa qol jetkizý jáne azamattardyń aqshasyn ıemdený. Mundaı jaǵdaıda dúrbeleńge salynbaı, áńgimeni úzip, bul týraly polıtsııaǵa nemese prokýratýraǵa dereý habarlaý kerek. Sol sekildi qarjy pıramıdasy da osyǵan uqsas. Onyń basynda turǵan belgili bir adamdar ǵana tabys tabady da, keıingi salymshylar aqshasyz qalady. Mysal retinde «Chıa Taı» pıramıdasyna qatysty qylmystyq isti keltirýge bolady. Olar ınvestıtsııa syltaýymen adamdardy joǵary tabys tabasyńdar dep úgittep, azǵyrdy. Saldarynan oblystyń 650 turǵynyna 760 mln teńge shyǵyn keltirildi. Osyndaılardan abaı bolý kerek», – dedi S.Shalabaev.
