BQO-da memqyzmetshilerdiń birkúndik jalaqysy shyǵysqazaqstandyqtarǵa aýdarylady

ORAL. QazAqparat  - BQO ákimdigi jáne óńirdegi basqa memlekettik mekemeler Shyǵys Qazaqstan oblysynda sý tasqynynan zardap shekkenderge qarjy aýdarady, dep habarlaıdy QazAqparat tilshisi.

BQO ákiminiń baspasóz qyzmetinen túsken málimetke qaraǵanda, olar birkúndik jalaqylaryn zardap shekkender qoryna aýdarady.

Shyǵys Qazaqstan oblysynda Aıagóz, Glýbokoe aýdandarynyń keıbir eldi mekenderin sý basyp, Ertis ózeniniń deńgeıi kóterilýine baılanysty Semeı qalasyna da qaýip tóndi.

Mundaı jaǵdaıdy batysqazaqstandyqtar 2011 jyly bastan keshirgen bolatyn. Bıyl da sý tasqyny qaýpi joq emes. Sondyqtan barlyq qyzmetter kúsheıtilgen jumys tártibine kóshirilip, tıisti sharalar  qolǵa alynǵan.