BQO-da mekteptiń tóbesi opyrylyp tústi
ORAL. QazAqparat - Batys Qazaqstan oblysy Qaztalov aýdany Saryqudyq aýylynda mekteptiń tóbesi qulady, dep habarlaıdy QazAqparat tilshisi.
Oblystyq Tótenshe jaǵdaılar departamentinen túsken málimetke qaraǵanda, oqıǵa keshe saǵat 20.40-ta bolǵan.
Bir qabatty ǵımaratta ınformatıka kabıneti men sport zalynyń tóbesi ishinara opyrylyp túsken. Aýmaǵy 60 sharshy metrdi qurady. Kóktemgi demalys ýaqyty bolǵandyqtan, ǵımaratta oqýshylar bolmaǵan. Zardap shekkender joq.
1977 jyly salynǵan mekteptiń jalpy aýmaǵy - 624 sharshy metr. Ǵımarat 2015 jyly apatty jaǵdaıda dep tanylǵan.
Aýdan ákimdiginiń derekteri boıynsha, mekteptiń ornyna jańasyn salý maqsatynda jobalyq-smetalyq qujattama ázirlenip, ol saraptamadan ótip te qoıǵan.
Oblystyq TJ departamentiniń bastyǵy Jasulan Jumashev búgingi brıfıngte málim etkenindeı, bıyl óńirde qardyń kóptiginen barlyǵy 29 ǵımarattyń shatyryna nuqsan keldi. Olardyń barlyǵy salynǵanyna 40-50 jyl bolǵan eski úıler.
Oral qalasynda 26 turǵyn úı men áleýmettik nysannyń shatyry búlindi.
Eske sala keteıik, budan buryn Oralda №1 emhananyń shatyry opyrylyp túskenin jazǵan bolatynbyz.
