BQO-da mektep ishinde tóbelesken oqýshy qyzdar jaýapqa tartyldy
ORAL. KAZINFORM — Batys Qazaqstan oblysynda 11-synypta oqıtyn qyzdar mekteptiń sport zaly qasyndaǵy kıim aýystyrýǵa arnalǵan bólme aldynda bir-birimen janjaldasyp, sońy tóbeleske ulasqan.
BQO sotynyń baspasóz qyzmetinen málim etkenindeı, oqýshylardyń áreketi muǵalimderdiń arashalaýynan keıin ǵana toqtatylǵan.
Atap aıtqanda, bir-biriniń shashyn tartyp, uryp-soqqan, saldarynan qoǵamdyq tártip pen azamattardyń tynyshtyǵyn buzǵan.
Sot otyrysynda jasóspirimder is materıaldarymen ishinara kelisip, basqa synyptyń qyzdary janjaldy birinshi bastaǵanyn kórsetti.
Olardyń zańdy ókilderi oqıǵany ózderiniń qyzdary men muǵalimderden estip, bilgenin rastady.
Sot qatysýshylardy tyńdap, is qujattaryn zerdelep, dálelderge baǵa berip, prokýrordyń olardy kináli dep taný kerek ekeni týraly qorytyndysymen kelisti.
Qyzdardyń quqyq buzýshylyq jasaǵany sotta bergen jaýaptarynan basqa, sot aldy tekserý kezinde jınalǵan is materıaldarymen, kýágerlerdiń jaýaptarymen, polıtsııa qyzmetkerleriniń baıanattarymen, hattamada kórsetilgen mán-jaǵdaılarmen tolyqtaı dáleldengen.
- Jasóspirim qyzdar QR Ákimshilik quqyq buzýshylyq týraly kodeksi 434-baby 1-bóligimen kináli dep tanylyp, olardyń zańdy ókilderine barlyq quny 43 250 teńge aıyppul salyndy. Qaýly zańdy kúshine engen joq, - dep habarlady vedomstvodan.
Eske sala keteıik, budan buryn BQO-da sot arqyly jumysyna qaıta ornalasqan qutqarýshy 2,3 mln teńge óndirgenin jazǵan edik.
