BQO-da mektep oqýshysy mashına aıdap, apatqa ushyrady
ORAL. QazAqparat - Jańaqala aýdanynda jol apaty oryn alyp, 17 jasar qyz bala aýrýhanaǵa tústi, dep habarlaıdy QazAqparat tilshisi.
Oqıǵa keshe keshkisin aýdan ortalyǵy Jańaqala aýyly mańynda boldy.
Oblystyq densaýlyq saqtaý basqarmasynyń baspasóz hatshysy Aınagúl Saqposynovanyń aıtýynsha, Jańaqalaǵa 4 shaqyrym jerge saǵat 19.20-da jedel járdem shaqyrtyldy.
Jol-kólik oqıǵasynan 2002 jylǵy qyz bala zardap shekken. Túnde Oral qalasynan neırohırýrg, hırýrg, reanımatolog shaqyrtylǵan.
«Qyzǵa ota jasaldy, jaǵdaıy óte aýyr», - dedi QazAqparat tilshisine Aınagúl Saqposynova.
Oblystyq polıtsııa departamentiniń baspasóz qyzmetinen túsken málimetke qaraǵanda, «Lada Largýs» avtokóliginiń júrgizýshisi Chapaev-Saıqyn jolynyń 121-shaqyrymynda, Jańaqala aýyly tusynda rýlge ıe bola almaı, kóligi aýdarylyp qalǵan.
Avtokólik rýlinde Jańaqala aýylyndaǵy №3 mekteptiń 11-synyp oqýshysy bolǵan. Kólikte odan basqa taǵy 5 oqýshy otyrǵan.
Aldyn ala málimet boıynsha nemeresi atasynan avtokóliktiń kiltin surap alyp, synyptastarymen birge qyzǵaldaq terýge barǵan.
Qazirgi kezde sotqa deıingi tergeý amaldary júrgizilýde.
