BQO-da medıtsınalyq mekemeler 71 mln astam teńgege negizsiz qyzmet kórsetken
ORAL. KAZINFORM — Batys Qazaqstan oblysynda 2025 jylǵy 11 aıdyń qorytyndysy boıynsha medıtsınalyq mekemelerde negizsiz esepke alýdyń 4 798 deregi anyqtalyp, onyń jalpy somasy 71 mln 557 myń 687,21 teńgege jetken.
«Áleýmettik medıtsınalyq saqtandyrý qory» KEAQ Batys Qazaqstan oblysy boıynsha fılıalynan málim etkenindeı, mekemeler kórsetilmegen qyzmetti kórsetildi dep tóleýge usynǵan.
2025 jyldyń qorytyndysy tolyq jabylǵan joq, derekteri naqtylanyp, keıin beriletin bolady.
Kazinform tilshisiniń arnaıy saýalyna jaýap bergen fılıal málimetine qaraǵanda, 2025 jyly 963 shaǵym túsken. Shaǵymdardyń basym bóligi medıtsınalyq kómektiń sapasyna, uzaq kútý máselelerine, dári-dármektiń ýaqtyly berilmeýine, sondaı-aq rastalmaǵan medıtsınalyq qyzmetterdiń kórsetilýine qatysty boldy.
Atalǵan aryzdardyń 510-y shaǵymdanýshylar tarapynan keri qaıtarylyp alyndy. Bul qor fılıalynyń aryz berýshilermen der kezinde baılanysqa shyǵyp, medıtsınalyq uıymdardaǵy patsıentterdi qoldaý jáne ishki baqylaý qyzmetimen birlese otyryp, naýqastardyń máseleleri boıynsha jedel sheshim qabyldaýynyń nátıjesinde júzege asty.
— 2025 jylǵy 31 jeltoqsandaǵy jaǵdaı boıynsha Batys Qazaqstan oblysynda MÁMS júıesinde 105 955 adam saqtandyrylmaǵan edi. Qazirgi tańda saqtandyrylmaǵan azamattar sany 81 809-ǵa deıin azaıdy. Bul nátıje qabyldanǵan zań aıasynda júzege asyrylyp otyr. ıAǵnı mindetti áleýmettik medıtsınalyq saqtandyrý júıesi aıasynda daǵdarysty jáne shuǵyl ál-aýqat deńgeıindegi (D jáne E sanattary) azamattar úshin jarnalar jergilikti bıýdjet qarajaty esebinen tólenedi, — dep habarlady vedomstvodan.
Eske sala keteıik, budan buryn BQO-da 108 myńnan astam adamnyń medıtsınalyq saqtandyrýdan tys qalyp otyrǵanyn jazǵan edik.