BQO-da medıtsınalyq mekemeden 8 qyzmetkerdiń paıdasyna 16 mln teńge óndirildi

ORAL. KAZINFORM – Oral qalasynyń № 2 sotynda Batys Qazaqstan oblysy ákimdigine qarasty «Oblystyq JITS-tiń aldyn alý ortalyǵy» MKK-nyń 8 qyzmetkerdiń aı saıynǵy 60 paıyz mólsherindegi qosymsha aqysyn alyp tastaýyna baılanysty azamattyq is qaraldy. 

BQO sotynyń baspasóz qyzmetinen málim etkenindeı, talap qoıýshylar jumys berýshiniń aı saıynǵy qosymsha aqyny alyp tastaý áreketin zańsyz dep tanyp, tólenbeı qalǵan qarajatty óndirýdi surady.

Jaýapker tarap talap qoıýshylardyń JITS-pen aýyratyn jáne AITV juqtyrǵan naýqastarǵa ekspress-test júrgizbeıtinin alǵa tartty. 

– Sot isti jan-jaqty qarap, jaýapkerdiń eleýli dáleldemeler keltirmegenin, al talap qoıýshylardyń laýazymdyq mindetterine dıagnostıka jáne emdeýmen baılanysty qyzmetter kiretinin anyqtady. Nátıjesinde sot talapty ishinara qanaǵattandyryp, 8 medıtsına qyzmetkeriniń paıdasyna laýazymdyq aılyqaqynyń 60 paıyzy mólsherindegi qosymsha aqy boıynsha bereshekti óndirdi. Sot sheshimimen jaýapkerden talap qoıýshylardyń paıdasyna barlyǵy 16 mıllıon teńgeden astam qarajat óndirildi. Sheshim zańdy kúshine endi, - dep habarlady vedomstvodan. 

Eske sala keteıik, budan buryn BQO-da tyıym salynǵan ýaqytta araq-sharap satýdyń 70 deregi anyqtalǵanyn jazǵan bolatynbyz.