BQO-da medıatsııa arqyly 821 mln. astam teńge óndirildi
ORAL. QazAqparat - BQO mamandandyrylǵan aýdanaralyq ekonomıkalyq soty talapker «QazTransGazAımaq» AQ-nyń «Jaıyqjylýqýat» AQ-dan kelisimshart boıynsha tutynylǵan gaz úshin 821 539 525 teńge bereshegin jáne 5 091 618 teńge turaqsyzdyq aıybyn óndirý týraly azamattyq isti medıatsııa tártibimen qysqartty, dep habarlaıdy «QazAqparat» tilshisi.
BQO sotynyń baspasóz qyzmetinen túsken málimetke qaraǵanda, isti qaraý barysynda taraptar jaýapkerdiń talapkerge bereshek pen turaqsyzdyq aıybyn tolyǵymen tólegenin alǵa tartyp, sýdıadan medıatsııa rásimin qoldanýdy ótindi.
Medıatsııa nátıjesinde taraptar bitimgershilik kelisimge kelip, onyń sharttary boıynsha jaýapker bereshegin tólep, al talapker osy somany qabyldaı otyryp, kórsetilgen másele boıynsha jaýapkerge qoıǵan talaptarynan bas tartady.
Sot kelisimdi «Medıatsııa týraly» QR Zańyna sáıkes bekitti. Sonymen qatar talapkerge memlekettik baj salyǵyn qaıtara otyryp, Azamattyq is júrgizý kodeksiniń 277-babyna sáıkes isti qysqartty.
