BQO-da Májilis depýtattary turǵyndardyń usynys-tilekteri eskeriletinin jetkizdi
ORAL. QazAqparat - Májilis depýtattary Gúljan Qaraǵusova, Tatıana ıAkovleva jáne Amanjan Jamalov BQO-ǵa jumys sapary kezinde Zelenov aýdany aktıvimen, sondaı-aq Oral qalasynda «Kvant» JShS ujymymen kezdesti, dep habarlaıdy «QazAqparat» HAA tilshisi.
Depýtattar Zelenov aýdany ortalyǵy Peremetnyı aýylyndaǵy Dostyq úıinde bolyp, osyndaǵy etnomádenı birlestikterdiń jumysymen tanysty. San ult ókilderi tatý-tátti ómir súrip, eńbek etetin aýyl-aımaqtyń tynys-tirshiligine qanyqty.
Aktıv jıynynda aýdan ákimi Kárim Jaqypov astyqty ári óndiristi óńirdiń áleýmettik-ekonomıkalyq damýyna toqtalyp, QR Táýelsizdiginiń 25 jyldyǵy toılanǵan 2016 jyldyń aýdan úshin asa tabysty bolǵandyǵyn, Elbasy tapsyrmasyna sáıkes alda turǵan maqsat-mindetterdiń odan da aýqymdy ekendigin jetkizdi.
Májilis depýtattary Elbasy bastamasymen qolǵa alynǵan memlekettik baǵdarlamalardyń oryndalý barysy týraly áńgimelep, turǵyndardyń saýaldaryna jaýap berdi.
Depýtattar G.Qaraǵusova, A.Jamalov, T.ıAkovleva sondaı-aq óńirge tanymal jıhaz shyǵarýmen aınalysatyn «Kvant» JShS qyzmetkerlerimen kezdesip, olardyń da usynys-pikirlerine den qoıdy.
«Kvant» JShS dırektory Mıhaıl Pshenıchnyıdyń aıtýynsha, elimiz táýelsizdik alǵan jyly qurylǵan seriktestikte qazirgi tańda 1200-deı adam eńbek etedi. Basty maqsat - kásiporynda ozyq tehnologııa negizinde óndiris jáne saýda oryndaryn keńeıtýmen birge jańa jumys oryndaryn ashý. «Kvant» - «Bıznestiń jol kartasy - 2020» baǵdarlamasynyń shapaǵatyn kórgen kásiporynnyń biri. Munda aldymen 390 mln. teńgege korpýstyq jıhaz úshin matrastar men penopolıýretan óndirisi jolǵa qoıylǵan bolatyn. Sodan keıin ındýstrııalandyrý kartasy aıasynda quny 1,1 mlrd. teńge turatyn jıhaz fabrıkasyn ashý qolǵa alyndy. Munda jatyn, as úı jáne balalar garnıtýrlary, basqa da túrli jıhazdar shyǵarylady. Endi aýmaǵy 10 myń sharshy metr aǵash óńdeý tsehyn ashý oılastyrylýda. Negizinen birden serııaly túrde qurastyrylatyn ónimder elimiz qalalaryna jóneltiledi. Osy oraıda kedergiler de joq emes. Mysaly, jol boıynda túrli mekemeler salatyn aıyppul kólemi qomaqty bolyp shyǵa keledi. Mine, osyndaı jaǵdaılar zań jolymen rettelse eken.
Májilis depýtaty Amanjan Jamalovtyń atap ótkenindeı, Elbasymyz shaǵyn jáne orta kásipkerlikke qoldaý kórsetýmen birge olar óndiretin ónim kólemin kóbeıtý mindetin qoıǵany belgili. Eger el ekonomıkasyndaǵy shaǵyn jáne orta kásipkerlik úlesi molaısa, túsetin salyq ta artady. Eń bastysy, kásiporyndar jańa tehnologııa negizinde óndiris turaqtylyǵy men óz jumys áleýetin saqtaı otyryp, halyqqa qajetti, sapaly ónim óndirýge baǵyt ustaýy tıis. «Aýdandar men Oral qalasyndaǵy kezdesýler kezinde aıtylǵan qundy usynys-pikirler Úkimetke deıin jetkizilip, jumys barysynda eskeriletin bolady», - dedi A.Jamalov.
