BQO-da masań kúıinde avtokólik aıdaǵan aýyl ákimi jaýapqa tartyldy
ORAL. KAZINFORM – QR Memlekettik qyzmet isteri agenttiginiń Batys Qazaqstan oblysyndaǵy Ádep jónindegi keńesiniń kezekti otyrysynda memlekettik qyzmetshilerdiń tártiptik isteri qaraldy.
QR Memlekettik qyzmet isteri agenttiginiń BQO boıynsha departamenti júrgizgen qyzmettik tergep-tekserýdiń qorytyndysynda málim bolǵanyndaı, Tasqala aýdany Shejin aýyldyq okrýginiń ákimi Mırjan Esqalıev ótken jyldyń 14 jeltoqsany kúni Oral qalasynda Subaru Outback kóligin masań kúıinde aıdaǵan.
Soǵan sáıkes M.Esqalıev sot qaýlysymen QR Ákimshilik quqyq buzýshylyq týraly kodeksiniń 608-baby 1-bóligimen kináli dep tanylyp, 15 táýlikke ákimshilik qamaqqa alynǵan. Oǵan qosa jeti jyl merzimge kólik quralyn basqarý quqyǵynan aıyrylǵan.
Aýyl ákimi óz túsiniktemesinde tártiptik teris qylyq jasaǵanyn moıyndaǵan.
Ádep jónindegi keńes músheleri M.Esqalıevti qatań sógis túrindegi tártiptik sharaǵa tartýdy qoldady.
Otyrysta sondaı-aq Qaratóbe aýdany jumyspen qamtý jáne áleýmettik baǵdarlamalar bóliminiń basshysy Bekbolat Berdiǵalıev pen bas mamany Baıan Jambylovaǵa qatysty tártiptik is talqyǵa salyndy.
Málim bolǵanyndaı, atalǵan bólim basshysy ótken jyldyń 31 qańtarynda «Nur armany» qoǵamdyq birlestigimen aýdannyń múgedektigi bar turǵyndaryna ınvataksı qyzmetin kórsetý úshin memlekettik satyp alý týraly shart jasaǵan. Talapqa sáıkes kreslo-arbamen qozǵalatyn nemese óz betimen júre almaıtyn múgedekterdi tasymaldaý úshin otyrǵyzýǵa jáne túsirýge arnalǵan arnaıy jabdyqtalǵan avtokólik paıdalanylýy tıis. Alaıdp jeńimpaz atanǵan «Nur armany» QB jabdyqtalmaǵan «KIA RIO» avtokóligimen qyzmet etken. Bul kreslo-arbamen qozǵalatyn jandardyń qatynaýyna qıyndyq týǵyzǵan. Kórsetilgen qyzmet úshin bólim basshysy aqyny tolyqtaı tólegen.
Ádep jónindegi keńes basym daýyspen B.Berdiǵalıevke qyzmetine tolyq sáıkes emestigi týraly eskertý berýdi jón dep tapty.
Atalǵan shart bólim basshysy men «Nur armany» QB arasynda jasalǵandyqtan, B.Jambylovanyń tártiptik isi toqtatyldy.
Eske sala keteıik, budan buryn BQO-da balaǵat sóz aıtqan aýyl ákiminiń tártiptik jaýapkershilikke tartylǵanyn jazǵan bolatynbyz.