BQO-da mas júrgizýshi polıtseıge 100 myń teńge para bermek boldy

ORAL. QazAqparat – Batys Qazaqstan oblysynda polıtseıge 100 myń teńge para bermek bolǵan mas júrgizýshi ustaldy, dep habarlaıdy QazAqparat tilshisi.

BQO Polıtsııa departamentiniń baspasóz qyzmetinen málim etkenindeı, oqıǵa Báıterek aýdany Darııan aýyly mańynda boldy.

Trassany baqylaý kezinde polıtsııa qyzmetkerleri 37 jastaǵy S. degen júrgizýshi aıdap kele jatqan «Toıota Korolla» avtokóligin toqtatqan.

«Júrgizýshiden spırttik ishimdiktiń ısi shyǵyp, polıtseıler ákimshilik hattamany resimdeı bastaǵan kezde S-nyń budan buryn da mas kúıinde avtokólik rýline otyrǵany úshin kólik júrgizý quqyǵynan aıyrylǵany anyqtaldy. Budan keıin júrgizýshi kishkene vıskı ishkenin moıyndap, 100 myń teńge usynǵan. Patrýldik polıtsııa qyzmetkerleri para bergeni úshin qylmystyq jaýapkershilikke tartylatynyn eskertkenine qaramastan, júrgizýshi aqshany qyzmettik kólik tósenishiniń astyna salǵan.

Oqıǵa ornyna Prıýral polıtsııa bóliminiń jedel tergeý toby kelip, S-ǵa qatysty QR QK 367-baby 1-bóligine (para berý) jáne 346-baby 1-bóligine (buryn kólik júrgizý quqyǵynan aıyrylǵan adamnyń masań kúıde kólikti basqarýy) sáıkes qylmystyq is qozǵaldy. Qazirgi kezde tergeý amaldary júrgizilýde», - dep habarlady vedomstvodan.

Eske salaıyq, budan buryn Oralda úsh avtokólik soqtyǵysyp, eki adamnyń jaraqat alǵanyn jazǵan bolatynbyz.