BQO-da mas ózbekstandyqtar kólikti aıdap ketip, jol apatyna tústi
Batys Qazaqstan oblysynda eki ózbekstandyq azamat avtokólikti aıdap ketip, mas kúıinde jol apatyna tústi, dep habarlaıdy Kazinform.
BQO polıtsııa departamentiniń baspasóz qyzmetinen málim etkendeı, oqıǵa 13 qarasha kúni túnde boldy.
«Shamamen saǵat 23.10-da Oral qalasy polıtsııa basqarmasy patrýldik polıtsııa batalonynyń qyzmetkerleri kúdik týdyrǵan Volkswagen Passat avtomashınasyn toqtatady. Alaıda avtokólik júrgizýshisi polıtsııa qyzmetkerleriniń kólik quralyn toqtatý týraly zańdy talaptaryna baǵynbaı, qozǵalysyn jalǵastyrady. Sodan keıin rýlge ıe bola almaı, M.Abdolov kóshesinde ornalasqan úıdiń qaqpasyna túıiskennen keıin polıtsııa qyzmetkerleriniń qolyna tústi» dep habarlady vedomstvodan.
Tekserý barysynda kólikte 1996 jylǵy ózbekstandyq eki azamattyń bolǵany jáne saraptama qorytyndysy boıynsha ekeýi de orta dárejede mas ekeni anyqtaldy.
Sonymen qatar quqyq buzýshylardyń avtokólikti aıdap áketkeni jáne ol kóliktiń Báıterek aýdanynyń 1978 jylǵy turǵynyna tıesili ekendigi belgili boldy.
Qazirgi kezde atalǵan derek boıynsha QR QK 200-baby 2-bóligine (aıdap ketý) sáıkes sotqa deıingi tergeý amaldary júrgizilip jatyr.
