BQO-da mas kúıinde kólik aıdaǵan mektep dırektory sógispen qutyldy

ORAL. KAZINFORM – Terekti aýdandyq sotynda Magıstral orta mektebiniń dırektory Gaýhar Orazovaǵa qatysty ákimshilik is qaraldy.

Sot qaýlysynan málim bolǵanyndaı, bıylǵy 4 jeltoqsanda saǵat 18.50 shamasynda Qumaqsaı aýylynda G.Orazova Hyundai Elantra avtokóligin masań kúıde basqarǵan.

Sot otyrysynda quqyq buzýshy kinásin moıyndap, qymyz ishkenin, odan alkogoldik masaıý bolatynyn bilmegenin alǵa tartty. Medıtsınalyq kýálandyrý qorytyndysy jeńil kúıdegi masań kúıdi kórsetken. Ol ákimshilik quqyq buzýshylyq týraly hattamamen kelisetinin bildirdi.

Sot qaýlysymen QR Ákimshilik quqyq buzýshylyq kodeksiniń 608-baby 1-bóligine sáıkes G.Orazova jeti jyl merzimge kólik quralyn basqarý quqyǵynan aıyryldy. Onyń kámeletke tolmaǵan jas balalary bar ekendigi eskerilip, ákimshilik qamaqqa alý jazasy qoldanylmady. 

Sot qaýlysy zańdy kúshine engen joq.

BQO bilim basqarmasynyń baspasóz qyzmeti atalmysh mektep dırektoryna sógis jarııalanǵanyn jetkizdi. 

Eske sala keteıik, budan buryn BQO-da jańadan salynǵan mektep ǵımaraty eki jyl ótpeı nelikten jabylǵanyn jazǵan edik.

Sondaı-aq BQO-da bylapyt sóz aıtqan memlekettik qyzmetshi qatań sógis aldy.