BQO-da mas kúıinde kólik aıdaǵan áıel jazadan qutylý úshin jalǵan anyqtama jasatqan

ORAL. KAZINFORM – Batys Qazaqstan oblysynda mas kúıinde kólik aıdaǵan áıel jazadan qutylý úshin jalǵan anyqtama jasatqan.

BQO prokýratýrasynyń baspasóz qyzmetinen málim etkenindeı, Bórli aýdandyq polıtsııa bólimi R. degen áıelge qatysty QR Ákimshilik quqyqbuzýshylyq kodeksiniń 608-baby 6-bóligine (alkogoldik masań kúıde kólik quralyn júrgizý) sáıkes hattama toltyrǵan.

Qamaýǵa alý túrindegi ákimshilik jaýapkershilikten jaltarý maqsatynda áıel Bórli aýdandyq ortalyq aýrýhanasynda feldsher bolyp jumys isteıtin B. degen dosynan óziniń júktiligi týraly jalǵan anyqtama berýin suraǵan. Ótinishti jerde qaldyrmaǵan feldsher jalǵan anyqtama berip, ol keıin sotqa usynylǵan. 

«Atalǵan derekter boıynsha Bórli aýdany prokýratýrasy tekserý júrgizip, sonyń qorytyndysy boıynsha jalǵan anyqtamany daıyndaǵan feldsherge qatysty QR QK 385-baby 1-bóligine, al quqyq buzýshy áıelge qatysty 385-baby 3-bóligine sáıkes qylmystyq is qozǵady. Bórli aýdandyq sotynyń úkimimen R. jalǵan qujatty paıdalanǵany úshin 20 AEK mólsherinde aıyppul tóleýge sottaldy. Oǵan qosa áıel Bórli aýdandyq sotynyń qaýlysymen Ákimshilik quqyqbuzýshylyq kodeksiniń 608-baby 6-bóligimen kináli dep tanylyp, oǵan 20 táýlik kóleminde ákimshilik qamaqqa alý jazasy taǵaıyndaldy. Al feldsherge jalǵan qujat jasaǵany úshin 50 AEK kóleminde aıyppul kesildi», dep habarlady vedomstvodan.

Eske sala keteıik, budan buryn BQO-da 24 mekteptiń órt qaýipsizdigi erejesin buzǵanyn jazǵan bolatynbyz.