BQO-da mas kúıinde jol apatyn jasaǵan turǵyn 20 táýlikke qamaldy
ORAL. QazAqparat - Batys Qazaqstan oblysynda mas kúıinde jol-kólik oqıǵasyn jasaǵan turǵyn 20 táýlikke qamaldy, dep habarlaıdy QazAqparat tilshisi.
BQO sotynyń baspasóz qyzmetinen túsken málimetke qaraǵanda, Qaztalov aýdandyq soty azamat A-ǵa qatysty QR Ákimshilik quqyqbuzýshylyq kodeksi 608-baby 6-bóligine sáıkes isti qarap, sheshim shyǵardy.
Sotta belgili bolǵandaı, Qaztalov aýylynda atalǵan azamat kólik quralyn basqarý quqyǵy joq bola tura, masań kúıinde «VAZ-21102» avtokóliginiń róline otyrǵan. Rólge otyrǵany óz aldyna, Syrym Datuly kóshesi boıyndaǵy №3 úıdiń janynda turǵan, B. degen azamatqa tıesili «Mazda» kóligin túıip, búldirip tynǵan.
Sot otyrysynda A. kinásin tolyq moıyndap, ókinetinin bildirdi.
Medıtsınalyq qorytyndyǵa sáıkes ol jeńil dárejedegi mas kúıinde bolǵan.
Sot qaýlysymen kináli dep tanylǵan A-ǵa 20 táýlikke qamaýǵa alý túrindegi ákimshilik jaza belgilendi.
Sot qaýlysy kúshine engen joq.
Eske sala keteıik, budan buryn osy aýdannyń Jalpaqtal aýylynda taǵy bir turǵynnyń mas kúıinde kóligin soǵyp, 30 táýlikke qamalǵanyn jazǵan bolatynbyz.
