BQO-da mas kúıinde tanysyn óltirgen turǵyn 13 jylǵa sottaldy
ORAL. QazAqparat - BQO qylmystyq ister jónindegi mamandandyrylǵan aýdanaralyq soty mas kúıinde tanysyn óltirgen Aqoryn Tasqarıevke qatysty úkim shyǵardy, dep habarlaıdy QazAqparat tilshisi.
A.Tasqarıev QR QK 99-baby 1-bóligine sáıkes aıypty dep tanylyp, ol 13 jylǵa bas bostandyǵynan aıyrý jazasyna kesildi.
Sottalýshynyń áreketterinde qylmystardyń qaýipti qaıtalanýy tanylǵandyqtan, jazasyn qaýipsizdigi joǵary qylmystyq-atqarý júıesi mekemesinde óteý belgilendi.
Atalmysh sottan túsken málimetke qaraǵanda, 8 tamyz kúni saǵat 09.00 shamasynda A.Tasqarıev Shyńǵyrlaý aýyly S.Datuly №19 mekenjaıyndaǵy úıiniń aýlasynda tanystary Q.Maltıev, E.Jurmaǵanbetov jáne N.Qusalaevpen birge araq ishken.
Araq ishý barysynda E.Jurmaǵanbetov Q.Maltıevpen sózge kelip, onyń betinen eki ret tepken. Q.Maltıevtiń beti qanap, úıge kirip, uıyqtap qalǵan. Qalǵan úsheýi biraz ýaqyt ótken soń úıge kirgen. Sol kezde uıqydan turyp, olarǵa qosylǵan Q.Maltıev qasynda otyrǵan E.Jurmaǵanbetovti qaıtadan balaǵattaı bergen soń odan A.Tasqarıev tynyshtalýyn suraǵan. Alaıda munyń eskertýin elemegennen keıin A.Tasqarıev qasyndaǵy E.Jurmaǵanbetovke ashana bólmesinen pyshaq alyp kelýin ótingen. Ol eshteńe oılamastan, pyshaqty A.Tasqarıevke ákelip bergen. Sózine qulaq aspaǵanyna ashýlanǵan A.Tasqarıev mas kúıinde N.Qusalaevqa: «Nurlan, qara, qalaı adam óltirý kerek ekenin» dep, oń jaǵynda otyrǵan Q.Maltıevtiń sol keýdesine bir ret soqqy jasaǵan. Sonyń saldarynan Q.Maltıev dálizge deıin júrip baryp, kóz jumǵan.
Sot úkimi zańdy kúshine engen joq.
