BQO-da mas kúıinde kólik júrgizgen sheneýnik jumysynan aıyrylýy múmkin
ORAL. QazAqparat – Batys Qazaqstan oblysynda mas kúıinde avtokólik aıdaǵan QR TJ mınıstrligi Ónerkásiptik qaýipsizdik komıtetiniń BQO boıynsha departamenti basshysynyń orynbasary Azamat Esenovti qyzmetinen bosatý usynyldy, dep habarlaıdy QazAqparat tilshisi.
A.Esenovtiń tártiptik isi QR Memlekettik qyzmet isteri agenttigi BQO-daǵy ádep keńesiniń 3 aqpan kúngi otyrysynda qaraldy.
QR memlekettik qyzmetshileriniń Ádep kodeksinde belgilengen qyzmetten tys ýaqytta minez-qulyq standarttarynyń talabyn saqtamaǵany, ıaǵnı kólik quralyn masań kúıde basqarǵany úshin A.Esenovke memlekettik laýazymynan bosatý túrindegi tártiptik jaza qoldaný jóninde QR Tótenshe jaǵdaılar mınıstrine usynys berý týraly sheshim qabyldandy.
Anyqtalǵanyndaı, A.Esenov Aqsaı qalasyndaǵy ónerkásip aımaǵy aýdanynda túngi saǵat 01.10-da avtokólikti mas kúıinde aıdaǵany úshin polıtsııa qyzmetkerlerimen ustalǵan.
Medıtsınalyq kýálandyrý boıynsha ol orta dárejeli mas kúıinde bolǵan.
A.Esenovke qatysty QR Ákimshilik quqyqbuzýshylyq kodeksi 608-baby 1-bóligine sáıkes hattama toltyrylyp, ol 2020 jylǵy 14 jeltoqsanda Bórli aýdandyq sotynda qaraldy.
Bórli aýdandyq sotynyń qaýlysymen A.Esenov aıypty dep tanylyp, 15 táýlik ákimshilik qamaqqa alynyp, 7 jylǵa kólik quralyn basqarý quqyǵynan aıyryldy.