BQO-da mamandandyrylǵan tergeý soty jumys jasaı bastady
ORAL. QazAqparat - Batys Qazaqstan oblysynda mamandandyrylǵan tergeý soty jumys jasaı bastady, dep habarlaıdy QazAqparat tilshisi.
BQO soty tóraǵasynyń mindetin atqarýshy Qaırat Adranovtyń aıtýynsha, «100 naqty qadam» Ult josparynyń 22-qadamyn júzege asyrý aıasynda bıylǵy 16 qańtarda Elbasy Nursultan Nazarbaev barlyq oblysta mamandandyrylǵan tergeý sottaryn qurý týraly Jarlyqqa qol qoıǵan bolatyn.
Oblystyq sottyń baspasóz qyzmetinen túsken málimetke qaraǵanda, Q.Adranov ujymǵa QR Prezıdentiniń bıylǵy 28 maýsymdaǵy №708 Jarlyǵymen taǵaıyndalǵan jańa sottyń sýdıasy Raýshan Ismaılovany tanystyryp, mamandandyrylǵan tergeý sotynyń jumysyna sáttilik tiledi.
«Mamandandyrylǵan tergeý sottary sottardaǵy aıyptaý men qorǵaý arasyndaǵy tepe-teńdikti qamtamasyz etedi. Tergeý sýdıalarynyń jumysy Qazaqstan Respýblıkasy Joǵarǵy sotynyń "Sot tóreliginiń 7 túıini" jobasyndaǵy basty mindetterdiń biri bolyp tabylady, tergeý sýdıalary sotqa deıingi satydaǵy tıisti sot baqylaýlaryn qamtamasyz etýge mindetti», dedi Q.Adranov.
BQO boıynsha sottar ákimshisi basshysynyń mindetin atqarýshy Shynar Tuńǵatarova shtattyq kestege sáıkes mamandandyrylǵan tergeý soty 1 tóraǵa, 1 sýdıadan jáne 6 memlekettik qyzmetshiden turatynyn jetkizdi. Bul sot qosymsha oryndardy bólmeı-aq, oblys sottarynan ishki aýystyrý esebinen quryldy.
