BQO-da maldyń egilgeni jóninde jalǵan aktiler toltyrylǵan - prokýratýra

ORAL. QazAqparat - Prokýratýra 2015 jyl men bıylǵy jyldyń ótken merzimi aralyǵynda jergilikti atqarýshy jáne ókiletti organdardyń mal aýrýyn boldyrmaý men ony joıý baǵytyndaǵy jumysyn teksergen kezde eleýli zańbuzýshylyqtardyń betin ashty.

BQO prokýratýrasynyń baspasóz qyzmetinen túsken málimetke qaraǵanda, aýyl sharýashylyǵy maldary men olardyń tólderin birdeılendirý jumysynyń ýaqtyly júrgizilmeıtini, aýrý mal tańbalarynyń maldárigerlik stansa qyzmetkerlerine berilmeı, mal soıý oryndarynda joıylatyny anyqtaldy.
Mal dárigerleri óz ýaqytyn únemdeý úshin aldymen iri sharýashylyqtardaǵy maldardy egedi de, usaq sharýashylyqtar men turǵyndardyń jeke ıeligindegi maldar tolyq qamtylmaı qalady. Úı janýarlaryn egý kezinde jalǵan akti toltyrý derekteri belgili boldy.
Mysaly, Bórli aýdanynda osyndaı 324-ten astam derek anyqtalǵan. Jalǵan akti toltyrý derekteri Shyńǵyrlaý, Jánibek, Syrym, Aqjaıyq, Qaratóbe, Jańaqala, Terekti jáne Bókeı ordasy aýdanynda da oryn alǵan.
Maldy ýaqtyly ektirmeý Bókeı ordasy aýdanynda olardyń qaýipti dertke shaldyǵýyna soqtyrdy. Oǵan qosa Aqjaıyq, Zelenov, Bókeı ordasy aýdandarynda aýrý maldy soıýǵa tapsyrýdan jaltarýshylar da kezdesken, munyń adamdar men janýarlardyń ómirine qaýip tóndiretini belgili.

Mal molalaryn zań talaptaryna sáıkestindirý de sheshilmeı keledi.

Osy anyqtalǵan zańbuzýshylyqtardy joıý baǵytynda prokýratýra organdary prokýrorlyq yqpal etý aktilerin, sonyń ishinde BQO ákimi atyna usynys engizdi.