BQO-da maldyń arasynda pasterellez derti anyqtaldy
ORAL. QazAqparat - Batys Qazaqstan oblysynda maldyń arasynda asa qaýipti eki aýrý oshaǵy anyqtalyp otyr. Bul týraly búgin Ortalyq kommýnıkatsııalar qyzmeti óńirlik fılıalynda BQO veterınarııa basqarmasynyń basshysy Qazbek Táshimov málim etti, dep habarlaıdy «QazAqparat» tilshisi.
Onyń aıtýynsha, iri qara arasynda qarasan Bókeı ordasynda, al pasterellez Qaratóbe aýdany Qoskól aýylynda tirkelip otyr. Atalmysh aýylda barlyǵy 1003 bas iri qara jáne 4600 bas usaq mal bar. Oblystyq veterınarlyq zerthanaǵa zertteýge 26 patologııalyq materal joldanǵan. Sonyń alǵashqylarynan pasterellez anyqtaldy, qalǵandary zerttelý ústinde. Ázirge shekteý qoıylǵan joq, barlyǵy belgili bolǵannan keıin tıisti shara alynady. Jaǵdaı baqylaýda.
Ótken jyly asa qaýipti juqpaly aýrýlardan 25 oshaq (sonyń 13-i qutyrý, ekeýi - pasterellez, 8-i qarasan, bireýi juqpaly rınotraheıt, taǵy bireýi túıneme) tirkelgen bolatyn.
«Bıyl veterınarlyq qaýipsizdikti qamtamasyz etý maqsatynda 838,5 mln. teńge bólinse, sonyń ishinde epızootııaǵa qarsy is-sharalardy júrgizýge 744,3 mln. teńge, maly brýtsellezge shaldyqqan turǵyndarǵa ótemaqy tóleýge 94,2 mln. teńge qaraldy. Qazirgi tańda oblysqa 2,8 mln. doza ekpe alynsa, sonyń 304,9 myńy nodýlıarly dermatıtke qarsy egilmek. Maldy egý jumystary bastaldy. Sonymen qatar oblys boıynsha buralqy ıt, mysyqtardy joıýǵa jergilikti bıýdjetten 47,4 mln. teńge qarastyrylyp, kúni búgin 6 myń ıt, 157 mysyq aýlandy», dedi Q.Táshimov.
