BQO-da mal urlyǵymen aınalysqandar sottaldy
ORAL. 10 sáýir. QazAqparat - Batys Qazaqstan oblysynyń Shyńǵyrlaý aýdanynda mal urlyǵyn «kásip» etip kelgender ustaldy.
Oblystyq prokýratýranyń baspasóz qyzmetinen túsken málimetke qaraǵanda, 2011 jylǵy 24 qazan kúni túngi saǵat bir shamasynda O.Nurǵalıev pen E.Mansurov bóten múlikti urlaý maqsatynda aldyn ala sóz baılasyp, Shyńǵyrlaý aýdany Segizsaı aýylynyń turǵyny Q.Isanqulovtyń mal aýlasynda turǵan jalpy quny 550 myń teńge bolatyn eki bıesi men aıǵyryn urlap, oqıǵa ornynan boı tasalaǵan.
O.Nurǵalıev pen E.Mansurov qylmystaryn ári qaraı jalǵastyryp, túngi saǵat bir jarym shamasynda Shyńǵyrlaý aýdany Segizsaı aýylynyń turǵyny Q.Esetbaevtyń mal aýlasynda turǵan jalpy quny 550 myń teńgege baǵalanǵan bir aıǵyry men bir bıesin qosa aıdap áketken.
Alaıda mal urlaǵandar alysqa uzaı almady. Shyńǵyrlaý aýdandyq sotynyń úkimimen O.Nurǵalıev pen E.Mansurov QR QK-niń 175-baby, 3-bólimi, «b» tarmaǵy (urlyq, ıaǵnı adamdar tobynyń aldyn ala sóz baılasýy boıynsha, bótenniń múlkin iri mólsherde jasyryn urlaý) boıynsha árqaısysy 3 jylǵa bas bostandyqtarynan aıyryldy. Jazalaryn jalpy rejimdegi túzeý kolonııasynda óteıdi. Sot úkimi zańdy kúshine endi.
