BQO-da mal urlyǵymen aınalysqan uıymdasqan top ustaldy
ORAL. QazAqparat - Batys Qazaqstan oblysynda «Barymtashy» respýblıkalyq jedel aldyn alý sharasy barysynda 43 mal urlyǵy ashyldy, dep habarlaıdy QazAqparat tilshisi.
BQO polıtsııa departamentiniń baspasóz qyzmetinen túsken málimetke qaraǵanda, sonyń ishinde 11 qylmystyń izi sýymaı ashyldy.
19 qylmys buryn jasalǵan mal urlyǵy bolsa, 13-i ótken jyldardyń úlesine tıedi.
Atap aıtqanda, BQO polıtsııa departamentiniń krımınaldyq polıtsııa basqarmasy men Jańaqala aýdandyq polıtsııa bólimi uıymdasqan topty qolǵa túsirdi. Bulardyń Jańaqala jáne Bókeı ordasy aýdandarynda 13 márte mal urlyǵyn jasaǵany áshkerelendi.
Polıtsııa departamenti mal ádette erkin jaıylysta júrgende, qoldy bolatyndyqtan, olardy baqylaý úshin GPS-treker qurylǵysyn ornatý kerektigin eske salady.
