BQO-da mal urlyǵyn uıymdastyrǵan top quramynda veterınarlar bolǵan
ASTANA. KAZINFORM — Batys Qazaqstan oblysynda mal urlyǵymen aınalysqan uıymdasqan toptyń joly kesildi, dep habarlaıdy oblystyq prokýratýranyń baspasóz qyzmeti.
Batys Qazaqstan oblysy prokýratýrasynyń bastamasymen júzege asyp jatqan «Qaýipsiz óńir» jobasy aıasynda mal urlyǵynyń aldyn alý men aýyl sharýashylyǵy taýar óndirýshileriniń quqyqtaryn qorǵaýda júıeli jumys júrgizilip jatyr.
Prokýratýranyń nusqaýlar berýi jáne jasyryn tergeý áreketterine bastamashylyq etýi arqyly oblys aýmaǵynda uzaq ýaqyt boıy mal urlaýmen aınalysqan uıymdasqan qylmystyq toptyń qyzmeti toqtatyldy.
— Tergeý barysynda uıymdasqan qylmystyq top quramynda veterınarııalyq dárigerler bolǵany jáne olar urlanǵan maldy derekter bazasy arqyly zańdastyrý jolymen ótkizý shemasyn uıymdastyrǵany anyqtaldy. Kúdiktiler qamaýǵa alynyp, tergeýge belsendi túrde járdemdesip keledi, — delingen habarlamada.
Oblys prokýratýrasy bul jaǵdaıdyń osyndaı qylmystardy jasaǵany úshin jazanyń bultartpastyǵyn aıǵaqtaıtynyn atap ótedi. Qylmystyq-protsestik kodekstiń 201-babyna sáıkes, sotqa deıingi tergep-tekserýdiń ózge málimetteri jarııa etilmeıdi.
Osyǵan deıin Pavlodar oblysynda mal urlyǵymen aınalysqan qylmystyq top ustalǵanyn jazdyq.
