BQO-da mal urlaýmen aınalysqandar ustaldy

ORAL. QazAqparat - Aǵymdaǵy jyldyń 16 aqpany kúni saǵat 6:00 shamasynda Serebrıakov aýyly mańynda jedel izdestirý is-sharalaryn júrgizý nátıjesinde BQO-da birqatar aýyr qylmystar jasaǵan 1990 jáne 1987 jyly týǵan eki azamat ustaldy, dep habarlaıdy QazAqparat.

Olardyń avtokólikteriniń salonyn tekserý kezinde 16 aqpanǵa qaraǵan túni kúdiktiler Aqjaıyq aýdanynyń Іlbishin aýylynan urlap áketken bir iri qara maldyń eti, balta, arqan jáne 3 pyshaq tabyldy.

«Olardyń basqa da ashylmaǵan qylmystarǵa qatystylyǵyn tekserý kezinde Aqjaıyq, Báıterek jáne Terekti aýdandarynyń aýmaǵynda 2022-2023 jyldary buryn jasalǵan taǵy 5 mal urlyǵy faktilerine qatystylyǵy anyqtaldy», - dep jazdy ІІM-nen.

Atalǵan fakt boıynsha QR QK 188-1 baby 3 bóligi boıynsha tergeý amaldary júrgizilýde. Kúdiktiler ýaqytsha ustaý ızolıatoryna qamaýǵa alyndy.