BQO-da mal soıý oryndarynyń 70 paıyzynda beınebaqylaý kameralary ornatyldy
BQO polıtsııa departamentiniń bastyǵy Arman Orazalıevtiń málim etkenindeı, jyl sońyna deıin barlyq mal soıý oryndary osyndaı qondyrǵymen qamtamasyz etiletin bolady.
Onyń sózine qaraǵanda, bul osy kásippen aınalysatyn adamdardyń ózderi úshin kerek. Olar óz esebinen beınebaqylaý kameralaryn ornatsa, bári de alaqandaǵydaı kórinip turady.
Departament bastyǵynyń aıtýynsha, oblysta mal urlyǵy máselesi óte ózekti bolyp otyr.
Kúni búginge deıin 94 mal urlyǵy tirkelse, sonyń 47-si ashylǵan joq. Sonyń ishinde 12-si aýyr qylmystar sanatyna jatady.
«Oblystyq jáne qalalyq batalondar mal tasymaldaýmen aınalysatyn kólikterdi udaıy tekserip jatyr. Sonyń nátıjesinde kúni keshe urlanǵan maldy tıep alyp kele jatqan, burynnan esepte turatyn júrgizýshi ustalyp, ýaqytsha ustaý ızolıatoryna qamaldy. Joldar baqylaýǵa alynǵannan keıin urylar basqa amalǵa kóshe bastady. Mysaly, Syrym jáne Jańaqala aýdanynda ózderiniń atyna tirkelgen myltyqpen maldy dalada atyp óltirip, soıǵan derekteri de tirkeldi», - deıdi Arman Moldııaruly.
Departament bastyǵy oblys ákiminiń qoldaýymen atalǵan batalondardyń jyl sońyna deıin 90 avtokólikpen qamtylatynyn jetkizdi.
Ol sondaı-aq Oral qalasynda «Kıber-sherıf» kesheni iske qosylatynyn aıtty. Shahar jyldamdyq ólsheý quraldarymen de tolyq qamtylatyn bolady. Aqsaı qalasynda da qazan aıynyń aıaǵyna deıin beınekameralar men jyldamdyq ólsheý qondyrǵylary ornatylady. Aldaǵy jyldyń birinshi toqsanynda Aqsaıda jedel basqarý ortalyǵy jumys isteıtin bolady.
«Maldy chıpteý de mańyzdy. Teriniń astyna engizilgen chıpti skanerlese, maldyń kimdiki ekeni belgili bolyp turady. Onyń jáne bir tıimdiligi, joǵalmaıdy. Jalpy, mal urlyǵynyń aldyn alý baǵytynda zamanaýı tásilderdi engizýdemiz. Aıtalyq, bir volonter drondardy qoldaný jóninde usynys jasady. Sondaı-aq oǵan polıtsııa qyzmetkerlerin úıretpekshi. Bul drondarmen tek kúndiz emes, túngi ýaqytta da maldy baqylaýǵa bolady eken. Muny da qarap kóremiz», dedi A.Orazalıev.
Eske sala keteıik, budan buryn «tramadol koroliniń» ne úshin tutqyndalǵany belgili bolǵanyn jazǵan edik.
Sondaı-aq Oral qalasynda 60 mektepte dabyl qondyrǵysy ornatyldy.