BQO-da mal izdeımin dep adasyp ketken turǵyn kórshi oblystan tabyldy
ORAL. QazAqparat – Batys Qazaqstanda adasyp ketken turǵyn kórshi oblystan tabyldy, dep habarlaıdy QazAqparat tilshisi.
BQO TJ departamentiniń baspasóz qyzmetinen túsken málimetke qaraǵanda, oqıǵa Jańaqala aýdany Kópjasar aýyldyq okrýginde bolǵan. 61 jastaǵy turǵyn 24 qazan kúni tańǵy saǵat 08.00-de Aıqoja («Edil-Jaıyq» sharýa qojalyǵy) qystaǵynan usaq mal izdeımin dep, atpen shyǵyp ketip, oralmaǵan.
Ony TJ (3 qyzmetker, 1 tehnıka), aýdandyq polıtsııa bólimi (3 qyzmetker) jáne jergilikti úsh turǵyn (1 tehnıkamen) izdestirdi.
Er adam 25 qazan kúni keshki saǵat 20.25-te 50 shaqyrym jerden, kórshiles Atyraý oblysy Inder aýdany aýmaǵynan aman-esen tabyldy. Ol medıtsınalyq kómekti qajetsingen joq.
Eske sala keteıik, budan buryn Aqjaıyq aýdanynda aǵa-inili eki balanyń joǵalyp ketkenin, keıin olardyń denesi ózennen tabylǵanyn jazǵan bolatynbyz.
