BQO-da mal izdep adasyp ketken alty adam qutqaryldy
ORAL. QazAqparat - 8 qańtar kúni Qaratóbe aýdany Sýlykól aýyldyq okrýgine qarasty Tólen aýylynyń turǵyndary «ÝAZ» jáne traktor kólikterimen mal izdeýge shyqqan.
BQO TJ departamentiniń baspasóz qyzmetinen túsken málimetke qaraǵanda, sol kúni aýa raıy buzylyp, boran soqqandyqtan ári janar-jaǵar maılary taýsylǵandyqtan, adamdar jolda qalady. Abyroı bolǵanda, zardap shegýshilerdiń biri eldi mekenge jetip, joldastarynyń qıyn jaǵdaıda qalǵandyǵyn habarlaıdy.
BQO TJ departamenti jedel qutqarý jasaǵynan on adam, eki tehnıka, izshil ıtimen jetip, izdestirý jumystaryn júrgizý nátıjesinde joǵalǵan alty turǵyn 9 qańtar kúni Tólen aýylynan jeti shaqyrym jerden tabyldy. Olardyń jaǵdaıy jaman emes, qutqarýshylarǵa alǵysyn bildirdi.
Іzdestirý jumystaryna sondaı-aq aýdandyq tótenshe jaǵdaılar bólimi (2 adam, 1 tehnıka), aýdandyq ishki ister bólimi (4 adam, 1 tehnıka), jergilikti atqarýshy organdar (2 adam, 1 tehnıka), aýyl turǵyndary (4 adam, 2 tehnıka) jumyldyryldy.
