BQO-da mádenıet salasynyń úzdikteri marapattaldy (FOTO)
ORAL. QazAqparat - Búgin Ǵ.Qurmanǵalıev atyndaǵy oblystyq fılarmonııa zalynda óńirdegi mádenıet salasynda jyl boıy atqarylǵan jumystar qorytyndylanyp, úzdikter marapattaldy.
Sharaǵa qatysqan oblys ákimi Nurlan Noǵaevtyń atap ótkenindeı, 2015 jyl Qazaq handyǵynyń 550 jyldyǵy, Uly Jeńistiń 70 jyldyǵy, Qazaqstan halqy Assambleıasy men el Konstıtýtsııasynyń 20 jyldyǵy syndy asa mańyzdy oqıǵalardy joǵary dárejede atap ótýmen erekshelendi. Osy mereıli sharalardy óz deńgeıinde ótkizýge mádenıet salasynyń qyzmetkerleri belsene atsalysty. Aq Jaıyqtan talaı talanttardyń túlep ushqany belgili. Óner tarlandary men mádenıet maıtalmandary búgingi tańda da elge talmaı qyzmet etýde. Bolashaqta da solaı bolary sózsiz. Buǵan barlyq jaǵdaı jasalýda. Elbasy tapsyrmasyna sáıkes áleýmettik sala, sonyń ishinde mádenıet nysandary salynýda. Sonyń ishinde, ásirese, uly aqynymyz, Qazaqstan halyq jazýshysy, Memlekettik syılyqtyń ıegeri Qadyr Myrza Áliniń qos birdeı eskertkishine qosa Oralda mádenıet jáne óner ortalyǵynyń ashylýy tek batysqazaqstandyqtar ǵana emes, búkil Alash jurtynyń abyroıyn asqaqtatyp, mártebesin kóterdi.
Saltanatty jıyn barysynda bir top mádenıet qyzmetkeri túrli marapattarǵa ıe boldy. Mysaly, belgili estrada ánshisi Marat Sarbópeevke QR Parlamenti Senatynyń tóraǵasy Qasymjomart Toqaevtyń atynan óner men mádenıetti damytýǵa sińirgen eńbegi úshin arnaıy medal tabys etilse, kóp jyldar boıy dástúrli án men terme ónerin nasıhattap kele jatqan Zııash Amanǵalıeva QR Mádenıet jáne sport mınıstrliginiń «Mádenıet salasynyń úzdigi» tósbelgisin ıelendi.
