BQO-da lıtsenzııasyz mıkrokarjylyq qyzmet uıymdastyrǵan kúdikti tergelip jatyr

ORAL. KAZINFORM — QMA Batys Qazaqstan oblysy boıynsha departamenti Oral qalasynda zańsyz mıkrokarjylyq qyzmet júrgizý faktisi boıynsha tergeý júrgizip jatyr. Bul týraly agenttiktiń baspasóz qyzmeti málim etti.

Tergeý málimetteri boıynsha, «Avans 07» JShS-niń basshysy tıisti lıtsenzııasyz azamattarǵa zergerlik buıymdardy kepilge alyp, aqsha berýdi uıymdastyrǵan.

— Atalǵan qyzmet «Ýralsk Zoloto» atty komıssıondyq dúkenniń jumysy retinde kórsetilip, jasyryn túrde júrgizilgen. Qaryzdar komıssııa sharttary arqyly rásimdelgen, al paıyzdyq tólemder zergerlik buıymdardy saqtaý qyzmetiniń aqysy retinde kórsetilgen, — delingen habarlamada.

Osy zańsyz qyzmettiń nátıjesinde 2 myńnan astam qaryz berilgen. Qylmystyq jolmen alynǵan tabys kólemi 128 mln teńgeden asty. Sot sanktsııasymen kúdiktiniń avtokóligi men 6 mln teńge kólemindegi qolma-qol aqshaǵa tyıym salyndy. Qazirgi ýaqytta tergeý amaldary jalǵasyp jatyr.