BQO-da «Lıder» qarjy pıramıdasynan zardap shekkender izdestirilýde
ORAL. QazAqparat – Batys Qazaqstanda «Lıder» qarjy pıramıdasynan zardap shekkender izdestirilýde, dep habarlaıdy QazAqparat tilshisi.
BQO boıynsha ekonomıkalyq tergeý departamenti málim etkenindeı, qazirgi kezde qarjylyq (ınvestıtsııalyq) pıramıda qurý deregine qatysty QR QK 217-babyna sáıkes qylmystyq is tergelýde.
Atalmysh departamentke aldanyp qalǵan azamattan aryz túsken. Ol «Lıder» jobasy boıynsha ınvestıtsııalanǵan qarajattyń 10 kún ishinde 100 paıyz syıaqymen qaıtarylatyny jóninde WhatsApp messendjeri arqyly taralǵan habarlamaǵa senip qalyp, 55 myń teńgesin aýdaryp jibergen. Alaıda shart oryndalmaı, aqshasynan aıyrylǵan.
«Biz basqa da aldanyp qalǵan turǵyndardy izdestirýdemiz. «Lıder» pıramıdasynan zardap shekkender 8-711-2-53-84-27 telefonyna habarlasa alady», dep habarlady BQO boıynsha ekonomıkalyq tergeý departamenti.
Eske sala keteıik, budan buryn BQO-da 10,4 mln astam teńgeni jymqyrǵan balabaqsha býhgalteri sottalǵanyn jazǵan bolatynbyz.
