BQO-da las sý aýylǵa qaraı aǵyp jatyr. Kommýnaldyq mekeme ne deıdi
ORAL. KAZINFORM — Áleýmettik jelide las sýdyń Jańaqala aýdany ortalyǵyna qaraı aǵyp jatqany jóninde beınejazba jarııalandy.
Jańaqala aýylynyń turǵyny Rýslan Orazalıevtiń Kazinform tilshisine málim etkenindeı, oqıǵa 21 qańtarda boldy.
— Qaldyq sýdy tógetin jalǵyz oryn aýyldan 1 shaqyrymǵa jetpeıtin, 800 metrdeı jerde ornalasqan. Ótken jyly da osyndaı oqıǵa oryn aldy. Úsh jyldaı ýaqyt buryn bul nysan kúrdeli jóndelgen. Solaı bola tursa da, aýylǵa qaraı sasyq sý aǵyp, jaıylyp jatyr. Bul qorshaǵan ortaǵa, ekologııaǵa úlken zııan keltiredi. Qaldyq sýdy assenızatorlardyń belgilengen jerge tókpeıtini anyqtaldy. Sondyqtan kommýnaldyq mekeme júrgizýshilermen túsindirme jumystaryn júrgizip, kemshilikke jol bermeýi kerek dep esepteımin. Búgin, 22 qańtar kúni kommýnaldyq kásiporyn qyzmetkerleri nysan basyna kelip, olqylyqtardy joıýǵa kiristi, — deıdi R.Orazalıev.
Osy oqıǵaǵa baılanysty Jańaqala aýdany ákimdiginiń sharýashylyq júrgizý quqyǵyndaǵy «Kommýnal» memlekettik kommýnaldyq kásiporny basshysy Asylbek Tóleshov jaýap berdi.
Onyń aıtýynsha, káriz sýyn tógetin polıfıltratsııa nysany Jańaqala aýdany ortalyǵynyń soltústik baǵytynda oryn tepken. Buǵan 2021 jyly kúrdeli jóndeý jumystary júrgizilgen. Atap aıtqanda, 1,3 shaqyrym qaldyq sýdy tógý orny qorshalyp, 6 temirbetondy qudyq aýystyryldy. Qaldyq sýdyń aǵý jolyna arnalǵan 200 metr lotoktar ornatyldy. Sonymen qatar assenızatorlar úshin arnaıy jasaqtalǵan qaldyq sýdy tógý orny belgilendi.
— Osy káriz tógetin orynǵa aýdan ortalyǵyndaǵy jeke menshiktegi onnan astam assenızator avtokólikteri jeke turǵyn úılerdiń jáne mekemelerdiń káriz sýyn tógedi. Jeke menshiktegi assenızator avtokólikteriniń arnaıy belgilengen orynǵa las sýdy tókpeýi saldarynan munyń polıfıltratsııa nysanynyń qorshaý syrtyna shyǵyp ketý jaǵdaıy oryn alyp otyr. Endigi kezde jeke menshiktegi assenızator avtokólikteri ıelerimen túsinik jumystary jáne polıfıltratsııa nysanynyń qorshaý ishindegi dambylardy qosymsha kóterý jumystary júrgizilip, syrtqa ketken las sý arnaıy avtokóliktermen polıfıltratsııa ishine tasylady, — dedi A.Tóleshov.
Eske sala keteıik, budan buryn Jaıyq boıynan topyraq qazyp alynyp jatqandyqtan, bul kóktemde sý tasqynyna ákelýi múmkin ekendigin jazǵan bolatynbyz.