BQO-da qyzylshamen aýyrǵan 100 adamnyń jartysyna jýyǵy - balalar
ORAL. QazAqparat - Batys Qazaqstan oblysynda jyl basynan beri 100 adam qyzylshaǵa shaldyqty. Bul týraly óńirlik kommýnıkatsııalar qyzmeti alańynda BQO taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Rınat Qubataev málim etti, dep habarlaıdy QazAqparat tilshisi.
Onyń aıtýynsha, sonyń 43-i nemese 43 paıyzy - 14 jasqa deıingi balalar.
Osynyń ishinde 19-y - bir jasqa deıingiler. Bul jalpy aýyrǵan balalardyń 44,1 paıyzyn quraıdy.
Qyzylshanyń teń jartysynan astamy, ıaǵnı 59-y Oral qalasynda, 20-sy Báıterek, jeteýi Bórli, altaýy Bókeı ordasynda, tórt-tórtten Syrym men Terekti aýdandarynda tirkeldi.
Qyzylshamen aýyrǵandarmen qarym-qatynasta bolǵan 1515 adamǵa medıtsınalyq baqylaý ornatyldy. Epıdemıologııalyq kórsetkishter boıynsha 166 adam egildi. Ekpeden bas tartqan otbasylardan 39 bala egildi.
«Sáýir-mamyr aıynda 6273 adam egilýi kerek bolsa, sonyń 6086-sy nemese 97 paıyzy qamtyldy. Sonyń ishinde josparlanǵan 9-10 aılyq 3161 balanyń 3082-si egildi. 2995 medıtsına qyzmetkeriniń 2887-si egilýden ótti», dedi Rınat Ámınuly.
Eske sala keteıik, budan buryn Oralda 10 aılyq sábıdiń neden kóz jumǵany belgili bolǵan edi.
