BQO-da qyzylshaǵa shaldyqqan 14 jasqa deıingi balalardyń barlyǵy ekpe almaǵan
ORAL. QazAqparat - Batys Qazaqstan oblysynda qyzylshamen aýyrǵandar sany 27-ge jetti, dep habarlaıdy QazAqparat tilshisi.
BQO qoǵamdyq densaýlyq saqtaý departamentiniń basshysy Jaıdar Qurmanov Óńirlik kommýnıkatsııalar qyzmetinde ótken brıfıngte málim etkenindeı, 27 adamnyń 13-i Oral qalasynyń turǵyndary.
Sondaı-aq Bórli aýdanynda - 6, Syrymda - 4, Báıterekte - 2, Bókeı ordasy men Terektide bir-birden osyndaı derek tirkeldi.
Aýyrǵan 27 adamnyń 9-y - 14 jasqa deıingi balalar. Olardyń bári de ekpe almaǵan.
«Qyzylsha adamnan adamǵa aýa arqyly juǵady. Mysaly, tumaýmen aýyrǵan bala mektepke kelse, búkil synypqa juqtyrady. Al qyzylshaǵa shaldyqqan jasóspirim búkil mektepke juqtyrady dep aıtýǵa bolady», - dedi Jaıdar Qurmanov.
Onyń sózine qaraǵanda, qyzylsha aýrýy ótken jyly Eýropa elderinde keń tarady. Mysaly, Ýkraınada 50 myń adam syrqattanyp, ǵalamtor derekteri boıynsha sonyń 16-sy kóz jumdy. Serbııada 5 myń adam osy dertke shaldyqty. Qazaqstanda qolǵa alynyp jatqan sharalarǵa qaramastan, osy kezge deıin 4600 adam qyzylshamen aýyrdy. Aýrý qozdyrǵyshy Eýropa elderinen kelip, tarady.
Oral qalalyq Qoǵamdyq densaýlyq saqtaý basqarmasynyń basshysy Mádenıet Tanaýov qyzylshadan saqtanýdyń jalǵyz joly ýaqtyly ekpe alý ekendigin jetkizdi.
Álsireý, dene qyzýynyń kóterilýi, bas aýyrý, murynnyń bitelýi, bórtpelerdiń paıda bolýy syndy alǵashqy belgiler paıda bolǵan kezde birden dárigerge qaralý qajet. Qyzylshadan der kezinde emdelmese, asqynyp, pnevmonııa, bronhıt, entsefalıtke soqtyrady.
Oblysta bıylǵy 1 sáýirden bastap qyzylshaǵa qarsy qosymsha ekpe bastaldy. ıAǵnı 9-10 aı aralyǵyndaǵy sábıler, 40 jasqa deıingi medıtsına qyzmetkerleri, 30 jasqa deıingi, ekpe statýsy belgisiz naýqaspen qarym-qatynasta bolǵandar, múldem ekpe almaǵandar egiledi.
Qyzylshaǵa qarsy ekpe tegin, oblys dári-dármekpen tolyq qamtylǵan. Bıylǵy birinshi jartyjyldyqqa 12 myń doza bólingen. Sondyqtan, ásirese, ata-analar balasy qyzylshaǵa qarsy egilgen be, aldymen sony anyqtaǵany jón.
Qyzylsha jóninde oblystaǵy call-ortalyqtyń 8-711-51-82-55, 8-747-760-57-04 telefondaryna habarlasyp, barlyq málimetti alýǵa bolady.
«Aýrýdyń qaı túri bolsyn, aldyn ala saqtanyp, ekpe alýdyń mańyzy zor. Ókinishke qaraı, oblysta 1100-den astam adam aýrý túrlerine qarsy egiletin ekpeden bas tartyp otyr. Onyń birinshi sebebi - olardyń senbeýi, ekinshisi dinı kózqarasqa baılanysty. Úshinshisi - túrli sebepter», - dedi J.Qurmanov.
