BQO-da qyzmettik ıtterdiń kómegimen 300-den astam qylmys ashyldy
ORAL. QazAqparat - Batys Qazaqstan oblysynda qyzmettik ıtterdiń kómegimen 300-den astam qylmys ashyldy, dep habarlaıdy QazAqparat tilshisi.
BQO polıtsııa departamentiniń baspasóz qyzmetinen túsken málimetke qaraǵanda, kınologııalyq qyzmet ortalyǵynda 28 qyzmettik ıt bar, kınolog mamandar solarmen birge jedel tergeý toby quramynda táýlik boıy kezekshilikte bolady, izdestirý sharalaryna qatysady.
Bıylǵy on aıda qyzmettik ıtterdiń kómegimen 300-den astam qylmys áshkerelense, sonyń 227-si - urlyq, 27-si - adam tonaý, 56-sy - esirtkige qatysty, ekeýi - adam óltirý, bireýi - aýyr dene jaraqatyn keltirý.
Polıtsııa departamenti kınologııalyq qyzmet ortalyǵynyń bastyǵy, polıtsııa maıory Talap Ásetovtiń aıtýynsha, qyzmettik ıtterdi tynbaı tárbıeleı bilse, óz jemisin beredi. Olar senimdi dosqa aınalady. Jattyǵý kúni boıy júrgiziledi.
«Itter esirtkini ıiskep, taba alady, kúdiktiniń izine túsedi. Qylmyskerdi quryqtaýǵa da qatysady. Osynshama qylmystyń ashylýy - sonyń dáleli. Ár ıttiń óz kórsetkishi bar», dedi T.Ásetov.
