BQO-da qyz zorlamaq bolǵan kúdikti qolǵa tústi
ORAL. QazAqparat - Batys Qazaqstan oblysynda qyz zorlamaq bolǵan kúdikti ustaldy, dep habarlaıdy «QazAqparat» tilshisi.
Shyńǵyrlaý aýdandyq ishki ister bóliminen túsken málimetke qaraǵanda, 10 qańtar kúni saǵat 20.30-da Shyńǵyrlaý aýylynda jasy 35-40 shamasynda, boıy 170-175 sm, azıat pishindes belgisiz er adam kámeletke tolmaǵan I-di zorlamaq bolǵan. Onyń ústine kúsh qoldana otyryp, qyzdyń uıaly telefonyn tartyp alǵan. Sodan keıin boı tasalaǵan.
Úsh kúnge sozylǵan jedel izdestirý sharalary barysynda kúdikti 13 qańtar kúni quryqtalyp, aýdandyq ishki ister bóliminiń ýaqytsha oqshaýlaý ızolıatoryna qamaldy. Ol buryn sottalǵan, esh jerde jumys jasamaıtyn Shyńǵyrlaý aýdanynyń N. degen turǵyny bolyp shyqty.
Qazirgi kezde atalǵan oqıǵa boıynsha qylmystyq is qozǵalyp, tergeý amaldary júrgizilýde.
