BQO-da qylmystyq-atqarý júıesinde 551 zańbuzýshylyq anyqtaldy
Oblys prokýrorynyń kómekshisi, ádilet keńesshisi Ádil Aqmýldınniń aıtýynsha, osy oryndarǵa júrgizilgen tekserýler nátıjesinde 551 zańbuzýshylyq, sonyń ishinde ustalǵandar men sottalǵandardyń konstıtýtsııalyq quqyǵyna qatysty 17 derek anyqtaldy. Osyǵan oraı 67 prokýrorlyq yqpal etý aktisi engizilip, 107 laýazymdy qyzmetker jaýapqa tartyldy. Qylmystyq-atqarý júıesi qyzmetkerleriniń zańsyz sheshimderi men is-áreketterine qatysty 8 narazylyq qanaǵattandyryldy. Qylmystyq-atqarý júıesi departamenti mekemeleriniń azyq-túlik satyp alýǵa qatysty 3 zańsyz buıryǵy buzylyp, 120 mln. bıýdjettik qarjynyń zańsyz jumsalýyna tosqaýyl qoıyldy, sondaı-aq tártiptik jaza qoldaný týraly 5 qaýlynyń kúshi joıyldy.
Túrme reformasy ekinshi forýmynyń usynbalaryn júzege asyrý aıasynda prokýratýra organdary 26 sharany (keńes, jumys kezdesýleri, ashyq esik kúnderi, bos oryndar jármeńkesi, t.b.) ótkizip, sonyń nátıjesinde kolonııalarda 8 jańa kásiporyn quryldy. Jazasyn óteýshilerdiń 64,7 paıyzy jumyspen qamtylyp, 84 qosymsha jumys orny ashyldy. Bıýdjet zańdylyǵyn saqtaý baǵytynda tıisti jumystar júrgizilip, sottalǵandardan 38,2 mln. teńge óndirildi. Sonymen qatar senip tapsyrylǵan múlikti ıelengeni jáne jymqyrǵany úshin «Eńbek-Oral» RMK BQO fılıalynyń dırektoryna qatysty qylmystyq is sotqa joldandy.
Elbasynyń «100 naqty qadam» Ult josparyna sáıkes sottalǵandardyń qoǵamǵa qaıta beıimdelýin júzege asyrý baǵytynda osy jumysty baqylaıtyn qoǵamdyq uıymdardyń ókilettilikteri keńeıtildi. Jyl basynan beri túrmede otyrǵandar sany 340 adamǵa nemese 62 paıyzǵa tómendedi. Óńirdegi túzetý kolonııalarynda jazasyn ótep shyqqan 270 adam qalypty ómirge oralýda. Qazirgi tańda raqymshylyq jasaýǵa da baılanysty tıisti jumystar atqarylýda.
