BQO-da qujattary sýǵa ketken azamattardan ótinish qabyldap jatyr
ASTANA. KAZINFORM – «Azamattarǵa arnalǵan úkimet» memlekettik korporatsııasy» BQO boıynsha dırektory, oblystyq qoǵamdyq shtabtyń múshesi Nádir Qurymbaev óńirdegi sý tasqynynyń qazirgi jaǵdaıy týraly málim etti.
«Qazir BQO-da 27 evakýatsııalaý pýnkti bar. Keshe jedel top músheleri, aqsaqaldar, qoǵam belsendileri ýaqytsha ornalasý pýnkterindegi turǵyndardyń jaǵdaıyn bildi. Ol jerlerde turmystyq jaǵdaı jasalǵan. Oqý protsesine onlaın júrip jatyr jáne sabaqtan tys is-sharalar da ótýde. Turǵyndar tarapynan shaǵymdar joq, dárigerler men tártip saqshylary táýlik boıy jumys istep jatyr», - dedi Nádir Qurymbaev Ortalyq kommýnıkatsııalar qyzmeti alańynda ótken baspasóz máslıhatynda.
Onyń aıtýynsha, turǵyndardy jyljymaıtyn múlikterdiń jaıy alańdatady.
«Qalalyq ákimdikpen birlesip «Azamattarǵa arnalǵan úkimettiń» qyzmetkerleri evakýatsııalaý pýnkterinde turǵyndarǵa keńes berip jatyr. Qujattary sýda qalǵan nemese joǵalǵan azamattardan ótinish qabyldap, HQO arqyly júzege asýda. Sonymen qatar biz «Batys Today» Telegram botyn qurdyq, ol jerde halyqty aqparattandyryp otyrmyz», - deıdi ol.
