BQO-da kúıeýin óltirýge tapsyrys berdi dep aıyptalǵan áıelge qatysty úkim shyqty

ORAL. KAZINFORM — BQO qylmystyq ister jónindegi mamandandyrylǵan aýdanaralyq sotynda Elvıra Erkebaeva men Maksım Kýznetsovqa qatysty úkim shyqty.

Ótken jyldyń tamyz aıynda bastalǵan sot talqysynda E.Erkebaeva men M.Kýznetsovqa QR QK 28-babynyń 3-bóligi, 28-babynyń 5-bóligi, 24-babynyń 1-bóligi, 99-babynyń 2-bóligi, 7), 8-tarmaǵyna (asa aýyr qylmysqa daıyndalý) sáıkes aıyp taǵylǵan bolatyn. 

Tergeý derekterine qaraǵanda, E.Erkebaeva burynǵy kúıeýi Erbol Erkebaevty óltirýdi uıymdastyrmaq bolyp sheshken. Osy maqsatta kıller jaldap, ol 2 mln teńgege kúıeýin óltirýi tıis bolǵan. Buǵan M.Kýznetsov kómektesken. Áıeldiń bul oıy júzege aspaı, M.Kýznetsov ekeýi ustalǵan bolatyn. 

BQO qylmystyq ister jónindegi mamandandyrylǵan aýdanaralyq sotynan málim etkenindeı, alaıda E.Erkebaeva men M.Kýznetsov alqabılerdiń úkimimen QR QK 287-baby 4-bóligine (adamdar tobynyń aldyn ala sóz baılasýymen qarýdy zańsyz ıemdený) sáıkes kináli dep tanyldy. 

Sot zań talaptaryn negizge ala otyryp, E.Erkebaeva men M.Kýznetsovqa atalǵan bapta kózdelgen eń az 3 jyl bas bostandyǵynan aıyrý jazasyn taǵaıyndady. QR QK-niń 63-baby qoldanyla otyryp, bul jaza shartty dep tanyldy.

Sottalýshylar sot zalynda bosatyldy.

Úkim zańdy kúshine engen joq.

Eske sala keteıik, budan buryn elektrondyq veıp satqan BQO turǵynyna úkim kesilgenin jazǵan edik.