BQO-da kúshti jel mektep pen klýbtyń shatyryn julyp ketti
ORAL. QazAqparat - Batys Qazaqstan oblysynda kúshti jel mektep pen klýbtyń shatyryn julyp ketti, dep habarlaıdy «QazAqparat» tilshisi.
BQO TJ departamentiniń baspasóz qyzmetinen alynǵan málimetke qaraǵanda, 5 aqpan kúni saǵat 09.08-de Zelenov aýdany Beles aýylynda Mektep kóshesi, 15-mekenjaıynda ornalasqan mektep-balabaqsha kesheni ǵımaratynyń 120 sharshy metr shatyry qulaǵany jóninde habar túsken. Ǵımarattyń jalpy aýdany - 3061 sharshy metr.
Sol sekildi saǵat 13.30-da Zelenov aýdany Novenkıı aýylynda Pıoner kóshesi, 9-mekenjaıynda klýbtyń da 114 sharshy metrdi quraǵan shatyry ushyp ketken.
Eki oqıǵa boıynsha da zardap shekkender joq. Oqıǵa ornynda arnaıy komıssııa jumys jasaýda.
Aıta keteıik, óńirde 4-5 aqpan kúnderi kúshti jel turyp, burqasyn kóteriletini jóninde BQO TJ departamenti eskertý jarııalaǵan bolatyn.
