BQO-da kúshti jel mádenıet úıiniń shatyryn julyp áketti
ORAL. QazAqparat - 3 maýsym kúni saǵat 15.30-da kúshti jel Syrym aýdany Araltóbe aýylyndaǵy eki qabatty mádenıet úıiniń jalpy alańy 250 sharshy metr shatyryn julyp áketti, dep habarlaıdy «QazAqparat» tilshisi.
BQO TJ departamentiniń baspasóz qyzmetinen túsken málimetke qaraǵanda, sol kúni saǵat 16.50-de osy aýdannyń Bulan aýylynda 24 sharshy metr sharýashylyq qurylysy men garajdyń tóbesi de sondaı kúıge ushyraǵan.
Syrym aýdany ákimi apparatynyń basshysy Erlan Sársenovtiń aıtýynsha, zardap shekkender joq. Mádenıet úıiniń tóbesin qalpyna keltirý jumystary júrgiziletin bolady.
Eske sala keteıik, óńirde jeldiń kúsheıetini jóninde BQO TJ departamenti 29 mamyrdan bastap birneshe ret eskertý jarııalaǵan bolatyn.
